प्रहरीसँग माफी माग्दै दुर्गा प्रसाईंले भने,‘ भागेको छैन’

काठमाडौं । शुक्रबार काठमाडौंको तीनकुनेमा भएको घटनापछि फरार रहेका दुर्गा प्रसाईंले प्रहरीसँग माफी मागेका छन् । उनी प्रहरीकाे खाेजी सूचीमा छन् । आइतबार भिडियाे सन्देश जारी गर्दै उनले  आफूलाई मार्ने योजना बनेको थाहा पाएपछि शुक्रबार प्रहरी घेरा तोडेको दाबी गरे । उनले प्रहरीसँग माफी पनि मागेका छन् ।

शुक्रबार तीनकुनेमा भएको प्रदर्शनका क्रममा प्रसाईंले प्रहरीको घेरालाई गाडीले पेल्दै अघि बढेका थिए । गाडी चलाउने क्रममा उनले अश्लील शब्द प्रयोग गरेका थिए । शुक्रबारको घटनामा दुई जनाको मृत्यु भएको थियो । सो घटनापछि प्रहरीले प्रसाईको खोजी गरेको थियो । आइतबार भिडियो सार्वजनिक गर्दै उनले भनेका छन्,‘म सुरक्षित बसेको मात्रै हुँ, भागेको छैन ।’

‘म आफू सुरक्षित हुन सुरक्षाकर्मीको घेरा तोडेको हुँ । तपाईंहरूप्रति लक्षित दुष्मनी होइन । तपाईंहरूलाई पर्न गएको चोटप्रति क्षमा चाहन्छु,’ प्रसाईंले भने ।

उनले आफूजति प्रहरी र दिनदुखीलाई माया गर्ने मान्छे कोही नभएको पनि दाबी गरेका छन् ।

‘मेरो कानको छेवैबाट गोली गयो । मैले कुरो बुझिसकेपछि मेरै गाडीमा अश्रुग्यास प्रहार भएपछि यस्तो भएको हो,’ प्रसाईंले भने,‘मलाई मार्ने योजना बुनेको थाहा पाएपछि प्रहरीको घेरा तोडेको हुँ ।’