पूर्वराजा शाहले बुझेनन् महानगरले काटेको जरिवाना पत्र

काठमाडौं । काठमाडौं महानगरपालिकाले पठाएको जरिवाना पत्र बुझ्न पूर्वराजा ज्ञानेन्द्र शाहले अस्वीकार गरेका छन् । शुक्रबार काठमाडाैंकाे तीनकुनेमा राजावादीकाे प्रदर्शन हुँदा दुई व्यक्तिकाे मृत्युसँगै आगजनी ताेडफाेड र लुटपाट भएकाे थियाे ।

शाहकै उक्साहटमा भएको आन्दोलनका क्रममा भएको फोहोर र तोडफोटको मूल्याङ्कन गरी महानगरपालिकाले पूर्वराजा शाहलाई ७ लाख ९३ हजार जरिवाना काटेको थियो ।

पत्र लिएर आज निर्मल निवास पुगेको महानगरपालिकाको टोलीलाई निर्मल निवासका कर्मचारीले फिर्ता पठाएका हुन् । ज्ञानेन्द्र शाहले पत्र बुझ्न नमानेपछि टोली यत्तिकै फर्केको नगर प्रहरी प्रमुख राजुनाथ पाण्डेले जानकारी दिए ।

निर्मल निवासले जरिवानाको पत्र बुझ्न नमानेपछि काठमाडौं महानगरपालिकाले कानुनी प्रक्रियामा गएर भएपनि उठाउने उनले बताए  । महानगरका कानुनी सल्लाहकार अधिवक्ता ओम प्रकाश अर्यालले पत्र बुझ्न नमाने पत्रीकामा सूचना निकाल्ने, हुलाक मार्फत चिठी पठाउन पनि सकिने बताए ।