जीवन विकासकाे विराटनगर शाखामा वित्तीय साक्षरता कार्यक्रम

विराटनगर । जीवन विकास लघुवित्त वित्तीय संस्थाको विराटनगर शाखाले केन्द्र प्रमुख गोष्ठी तथा वित्तीय साक्षरता कार्यक्रम सम्पन्न गरेको छ । जीवन विकासका शाखाले हरेक २–२ वर्षमा केन्द्र प्रमुख गोष्ठी तथा वित्तीय साक्षरता कार्यक्रम सञ्चालन गर्छन् ।

शुक्रबार विराटनगर शाखाले केन्द्र प्रमुख गोष्ठी तथा वित्तीय साक्षरता कार्यक्रम आयोजना गरेको हो ।

कार्यक्रमको उद्घाटन सत्रमा बोल्दै विराटनगर महानगरपालिका –३ का वडाध्यक्ष बासुबहादुर बस्नेतले जीवन विकासले विनाधितो सामुहिक जमानीका आधारमा ऋण लगानी गर्दा विपन्न नागरिकको जीवनस्तर उकास्न सहयोग पुगेको बताए । गाउँघरमा पुगेर सरकारले प्रवाह गर्न नसकेको सेवा जीवन विकासले प्रवाह गरिरहेको उनले बताए ।

विराटनगर महानगरपालिका वडा नम्बर ५ का वडाध्यक्ष सन्तोष न्यौपानेले जीवन विकासले गरिबी निवारणको क्षेत्रमा महत्त्वपूर्ण योगदान गरेको बताए । ठूला बैकको पहुँचमा नरहेकालाई लघुवित्तले सहज रुपमा ऋण प्रवाह गरेको बताउँदै उनले लिएको ऋणको सहि सदुपयोग गर्न आग्रह गरे । एक मुष्ठ लिएको ऋणको सदुपयोग गरे सानोसानो किस्तामा चुक्ता गर्नका लागि समस्या नपर्ने उनले बताए ।

जीवन विकास लघुवित्त वित्तीय संस्थाका प्रमुख कार्यकारी अधिकृत संजय कुमार मण्डलले सहभागीहरुलाई सुनिश्चित भविष्यको लागि आजैदेखि बचत गर्न आग्रह गरे । सदस्यको प्रगतिका लागि जीवन विकासका कर्मचारी घर–घर पुगेर सेवा प्रवाह गरिरहेको बताउँदै उनले ऋणको सही सदुपयोग गराउन केन्द्र प्रमुख र उपप्रमुखको भूमिका महत्वपूर्ण हुने बताए । केन्द्र (सदस्यहरुको समुह) लाई ऋण लगानीको सिफारीस गर्ने अधिकार हुने बताउँदै उनले समुहको सिफारीसबाट पाएको ऋण सदुपयोग गरी लाखौं परिवारले आर्थिक प्रगति गरेको बताए । उनले जीवन विकासका सबै सेवाहरु उत्कृट र सदस्यमुखी भएकाले उपभोग गरी जीवनस्तर उकास्न आग्रह गरे ।

केन्द्र प्रमुख गोष्ठीको अवसरमा जीवन विकासको विराटनगर शाखाले पाँच अतिविपन्न परिवारका ७ जना बालबालिकाको अभिभावकत्व लिएको छ । अभिभावकत्व ग्रहण गरेका बालबालिकाको अध्ययनका लागि एक वर्ष जीवन विकासले शैक्षिक सामग्री उपलब्ध गराउनेछ ।

सोही क्रममा उत्कृष्ट बचतकर्ता बेलमाया विश्वकर्मा, रेनुदेवी साह, उर्मिला रायलाई पुरस्कृत गरिएको छ । उत्कृष्ट ऋणी तर्फ उषा गुरुङ, रितादेवी यादव, बुनु यादव पुरस्कृत भए । लघुवित्तले उत्कृष्ट उद्यमी तर्फ राजीव साह, रञ्जुदेवी शर्मा, गीतादेवी साहलाई पुरस्कृत गरेको छ ।

केन्द्र तर्फ केन्द्र नम्बर ६३ हाम्रो जीवन विकास उत्कृष्ट घोषित हुँदै प्रथम पुरस्कार प्राप्त गरेको छ । केन्द्र नम्बर ४० सिङ्घिया जीवन विकासले दोस्रो पुरस्कार प्राप्त गर्यो । केन्द्र ६६ बरमपुरा जीवन विकास केन्द्रले तृतीय पुरस्कार प्राप्त गर्यो । केन्द्र नम्बर ३९ इक्राही जीवन विकास र केन्द्र नम्बर ११८ नेपाल जीवन विकास केन्द्रले सान्त्वना पुरस्कार प्राप्त गर्यो । सदस्य र केन्द्रलाई जीवन विकासका प्रमुख कार्यकारी अधिकृत मण्डल र तालिम विभाग प्रमुख रञ्जना निरौलाले पुरस्कार वितरण गरे ।

कार्यक्रमका सहभागी केन्द्र प्रमुख तथा उपप्रमुखलाई तालिम विभाग प्रमुख निरौलाले वित्तीय सचेतना सम्बन्धि प्रशिक्षण दिएकी थिइन् ।