पूर्वाञ्चल विश्वविद्यालयको सेवा आयोगमा नेविसंघकाे ताला

विराटनगर । पूर्वाञ्चल विश्वविद्यालय सेवा आयोगकाे कार्यालयमा सत्तारुढ दल नेपाली कांग्रेसको भातृ संगठन नेपाल विद्यार्थी संघले ताला लगाएको छ । उपप्राध्यापक पदमा बढुवाका लागि विज्ञापन निकालेपछि नेविसंघले फागुन १७ गतेदेखि तालाबन्दी गरेको हो ।

पूर्वाञ्चल विश्वविद्यालय सेवा आयोगका अध्यक्ष महेशप्रसाद दाहाल चैत २१ पछि अवकासमा जाँदेछन् । कार्यकालको अन्त्यमा उनले कर्मचारी र शिक्षक बढुवा गर्न खोजेका थिए । अधिकांश कर्मचारीको बढुवा भइसकेको छ । उपप्राध्यापक बढुवाका लागि फागुन १८ गते अन्तरवार्ताको मिति तोकिएको थियो । तर नेपाल विद्यार्थी संघले फागुन १७ गते नै तालाबन्दी गरेपछि प्रक्रिया रोकिएको हो ।

नेपाल विद्यार्थी संघका केन्द्रीय सदस्य अभिषेक भट्टराईका अनुसार नयाँ  नियमावली बनेपनि पुरानै नियमावली अनुसार बढुवा सूचना निकालेपछि ताला लगेको हो ।

पूर्वाञ्चल विश्वविद्यालय ऐन २०५० अनुसार सञ्चालन हुन्छ ।ऐनका आधारमा पूर्वाञ्चल विश्वविद्यालय नियमावली २०५३ जारी भएको छ । सोही नियमावलीको आधारमा पुविले शिक्षक छनौट तथा पदोन्नति प्रक्रिया एवं कार्यप्रणाली २०७३ जारी भएको छ । सोही कार्यप्रणाली अनुसार यसअघि आन्तरिक र खुल्ला प्रतियोगिता भएको थियो ।

२०७८ मा बसेको विश्वविद्यालयको ३५ औ सभाले विश्वविद्यालयको नियमावलीलाई संसोधन गरेको थियो । संशोधित नियमावली अनुरुप शिक्षक छनौट गर्नु पर्ने भएपनि सेवा आयोगले पुरानै पाँचौंं सभाले बनाएको नियमावलीका आधारमा प्रक्रिया अघि बढाएको विद्यार्थीको गुनासो छ । उपप्राध्यापक विज्ञापन गैरकानुनी भएकाले तालाबन्दी गरेको उनले जानकारी दिए ।

उनका अनुसार संसोधित नियमावलीमा उप– प्राध्यापक पद सबै विज्ञापन खुला गर्नुपर्ने उल्लेख छ । तर सेवा आयोगको विज्ञापनमा आन्तरिक प्रतियोगिता अन्तर्गत राखिएको छ,जुन कानुन सम्बत छैन,’ उनले भने । प्रक्रिया पुरा गरेर मात्रै नियुक्तीको प्रक्रिया अघि बढाउन उनले आग्रह गरे ।