नेपालमा ३५५ पुग्यो बाघको संख्या

चितवन । नेपालमा बाघको सङ्ख्या बढेको छ । नेपालमा बाघको सङ्ख्या सन् २००९ मा एक सय २१ थियो । सन् २०२२ मा बढेर तीन सय ५५ पुगेको हो ।

बाघको सङ्ख्या सन् २०१३ मा एक सय ९८ र सन् २०१८ मा दुई सय ५३ थियो ।

बाघको सङ्ख्या बढ्दै गर्दा बासस्थान क्षेत्र भने घटेको छ । निकुञ्ज क्षेत्र, मध्यवर्ती क्षेत्र र अन्य वन क्षेत्र बाघको बासस्थान भए पनि बाघको सङ्ख्या बढ्न थालेपछि बासस्थानको समस्या बढेको हो ।

चितवन राष्ट्रिय निकुञ्जले आयोजना गरेको अन्तरक्रिया कार्यक्रममा राष्ट्रिय निकुञ्ज तथा वन्यजन्तु संरक्षण विभागका वरिष्ठ इकोलोजिष्ट हरिभद्र आचार्यले बाघका लागि बासस्थान बढाउन आवश्यक रहेको बताए ।

विगत पाँच वर्षयता बाघको सङ्ख्या बढ्दै गएकाले बासस्थान पनि बढाउन आवश्यक रहेको उनले बताए । पछिल्ला वर्षहरूमा बाघको संरक्षणमा ध्यान दिइएकाले बाघको सङ्ख्या बढ्दै गएको उनले बताए ।