आईपीएलकाे उद्घाटन खेलमा आरसीबीको जित, आज दुई खेल

काठमाडौं । रोयल च्यालेन्जर्स बैंगलोर (आरसीबी)ले इन्डियन प्रिमियर लिग (आईपीएल) २०२५ को उद्घाटन खेलमा शानदार जित निकालेको छ । शनिबार डिफेन्डिङ च्याम्पियन कोलकाता नाइट राइडर्स (केकेआर) लाई ७ विकेटले पराजित गरेको हो ।

इडेन गार्डन्स स्टेडियम, कोलकातामा भएको खेलमा आरसीबी ले १७५ रनको लक्ष्य १६।२ ओभरमा ३ विकेट गुमाएर पूरा गरेको थियो। विराट कोहली ५९ रन बनाएर अविजित रहे । कप्तान रजत पाटीदारले १६ बलमा ३४ रन र फिल साल्टले ३१ बलमा ५६ रन बनाए । केकेआर का लागि वरुण चक्रवर्ती, वैभव अरोरा र सुनील नारायणले एक–एक विकेट लिए।

टस हारेपछि पहिले ब्याटिङ गरेको केकेआर ले २० ओभरमा ८ विकेट गुमाएर १७४ रन बनायो । केकेआरका लागि कप्तान अजिंक्य रहाणेले ३१ बलमा ५६ रन बनाए । सुनील नारायणले २६ बलमा ४४ रन जोडे । आरसीबी का क्रुणाल पाण्ड्याले उत्कृष्ट प्रदर्शन गर्दै ३ विकेट लिए । जोश हेजलवुडले २ विकेट हात पारे। यश दयाल, रसिक सलाम र सुयश शर्माले एक–एक विकेट लिए।

आईपीएल– २०२५ मा आज दुई खेल हुँदैछ । पहिलो खेल दिउँसो ३ः४५ बजे सनराइजर्स हैदराबाद र राजस्थान रोयल्सबीच हैदराबादमा हुनेछ । दोस्रो खेल साँझ ७ः४५ मा चेन्नई सुपर किंग्स र मुम्बई इन्डियन्सबीच चेन्नईमा हुनेछ ।