बेलबारी बहुमुखी क्याम्पसको स्ववियु सभापतिमा क्रान्तिकारीका विष्ट निर्वाचित

विराटनगर । बेलबारी बहुमुखी क्याम्पस मोरङको स्ववियु सभापतिमा अखिल क्रान्तिकारीका उम्मेदवार कपिल विष्ट विजयी भएका छन् ।

नेकपा एमाले निकट अनेरास्ववियुका प्रशान्त पोखरेललाई ३४ मतान्तरले पराजित गर्दै विष्ट निर्वाचित भएका हुन् । बेलबारी क्याम्पसको स्ववियु नेतृत्वका लागि शनिबार मतदान भएको थियो । १९५ मतसहित विष्ट विजयी हुँदा पोखरेलले १६१ मत प्राप्त गरे ।

स्ववियुको सचिवमा अनेरास्ववियुका अर्जुन कोइराला विजयी भएका छन् । कोषाध्यक्षमा क्रान्तिकारीकै नवराज थापा निर्वाचित भएका छन् ।

बेलबारी क्याम्पसमा यसअघि नेपाल विद्यार्थी संघले जितेको थियो । आन्तरिक विवादका कारण यसपटक नेविसंघले उम्मेदवारी दिएन् ।

बेलबारी सँगै अखिल क्रान्तिकारीले मोरङमा जितेको स्ववियु संख्या ६ पुगेको छ ।

बेलबारी बहुमुखी क्याम्पसहित मोरङका ११ क्याम्पसमा निर्वाचन भएको थियो । क्रान्तिकारीले ३ आंगिकसहित ६ वटामा विजयी भएको हो । नेविसंघ ३ र अनेरास्ववियु २ क्याम्पसमा विजयी भएको छ ।

अखिल क्रान्तिकारीले आङ्गिक क्याम्पस महेन्द्र मोरङ आदर्श बहुमुखी क्याम्पस, स्नातकोत्तर क्याम्पस र विराटनगर नर्सिङ क्याम्पससहित कानेपोखरीको रमाइलो बहुमुखी क्याम्पस, बेलबारी क्याम्पस र मिक्लाजुङको मिक्लाजुङ क्याम्पसको स्ववियु जितेको थियो ।

अनेरास्ववियुले सुकुना बहुमुखी क्याम्पस र केराबारी बहुमुखी क्याम्पस सभापति जितेको थियो । नेविसंघले लेटाङ क्याम्पस, उर्लाबारी र पथरी क्याम्पसको स्ववियु सभापति नेविसंघले जितेको थियो ।