इलाममा मासुका लागि काटियो गाेठमा बाँधेकाे जिउँदो गोरुको फिला

काठमाडौं । इलाममा मासुका लागि जिउँदो गोरुको फिला काटेर लगेकाे घटना बाहिर आएको छ । इलामको सूर्योदय नगरपालिका ६ कन्याममा गोठमा बाँधिएको गोरुको फिला काटेको घटना बाहिर आएको हो ।

गोरुको एकापाटा फिलाको भाग काटिएको छ । हड्डीसम्म खुर्किएर करिब चार किलो मासु निकालेर लगेको स्थानिय संचारकर्मी गोपाल गिरी जानकारी गराएका छन् ।

गोरु स्थानिय राम राईले पालेका हुन् । साेही गोरुको यसअघि पनि फिला काटेर लगिएको थियो । घरेलु उपचारपछि निको हुँदै गएको थियो । तर, फेरि फिलाको मासु काटेका कारण गाेरु मरेकाे छ । गोरु धनी राई बिहान गोठमा जाँदा गोरु मरिसकेको थियो ।

यसअघि पनि उनको गोठकाे अर्काे गोरुको फिला पनि काटिएको थियो ।

आफ्नो गोठमा बाँधिएको गोरुको फिला काट्ने क्रम नरोकिएपछि राईले स्थानीय जनप्रतिनिधि, प्रहरीलाई बोलाएर कारबाहीको लागि अनुरोध गरेका थिए ।