विराटनगरको दुर्गा चोकमा खुकुरी प्रहार

विराटनगर । विराटनगर महानगरपालिका– २ दुर्गा चोकमा बिहीबार राति खुकुरी प्रहार हुँदा एक जना गम्भीर घाइते भएका छन् । मोरङ प्रहरीका अनुसार दुर्गा चोकमा राति साढे ८ बजे खुकुरी प्रहार भएको हो ।

खुकुरी प्रहारबाट अन्दाजी ५५ वर्षीय रमेश गुप्ता घाइते भएका हुन् । उनको घाँटीमा गम्भीर चोट छ । उनलाई उपचारका लागि नोबेल मेडिकल कलेजमा भर्ना गरिएको छ ।

मोरङ प्रहरी प्रवक्ता डिएसपी वेदप्रकाश जोशीका अनुसार स्थानीय अन्दाजी २८ वर्षीय सक्षम सापकोटाले धारिलो हतियार प्रहार गरेका हुन् । राय र सापकोटा चिनजानका व्यक्ति हुन् ।

प्रारम्भिक अनुसन्धानका क्रममा सापकोटा लागूऔषध प्रयोगकर्ता रहेको खुलेको उनले बताए । खुकुरी प्रहारकाे कारण खुलेकाे छैन ।

घर अगाडि खुकुरी प्रहार गरेर सापकोटा भान्सा कोठामा  पसेका थिए । प्रहरीले ढाेका फाेडेर हेर्दा उनी भान्सा कोठाकै अर्को ढोकाबाट निस्किएर फरार भइसकेका थिए । फरार रहेका सापकाेटाकाे खाेजी भइरहेकाे जाेशीले जानकारी दिए ।