मोरङको चार क्याम्पसमा अखिल क्रान्तिकारी विजयी

विराटनगर । मोरङको चार क्याम्पसकाे स्ववियु सभापति नेकपा माओवादी केन्द्रको भातृ संगठन अखिल क्रान्तिकारीले जितेकाे छ । माेरङमा त्रिभुवन विश्वविद्यालय अन्तरगतका ८ वटा क्याम्पसको मतपरिणाम सार्वजनिक हुँदा अखिल क्रान्तिकारीले चार वटा क्याम्पसको स्ववियु जितेको हो । अनेरास्ववियु र नेविसंघले २–२ वटा क्याम्पसकाे सभापति जितेकाे छ ।

अंगीक क्याम्पसमध्ये विराटनगरको डिग्री क्याम्पसमा र विराटनगर नर्सिङ क्याम्पसमा अखिल क्रान्तिकारी विजयी भएको छ । डिग्री क्याम्पसमा क्रान्तिकारीका प्रीतम साहको प्यानलै निर्वाचित भएको छ । नर्सिङ क्याम्पसको सभापतिमा पनि अखिल क्रान्तिकारीका रोहित ताजपुरिया निर्वाचित भएका छन् ।

कानेपोखरीस्थित रमाइलो क्याम्पसको सभापतिमा अखिल क्रान्तिकारीका अनिश कार्की निर्वाचित भए । मोरङको मिक्लाजुङ क्याम्पसको सभापतिमा अखिल क्रान्तिकारीका सुजन घिमिरे निर्वाचित भए ।

केरावारीको खदम क्याम्पसको सभापतिमा अनेरास्ववियुका सङ्गम कन्दङ्वा विजयी भए । सुन्दरहरैचाको सुकुना बहुमुखी क्याम्पसमा अनेरास्ववियुका एलिस ओझा विजयी भए ।

पथरी बहुमुखी क्याम्पसको सभापतिमा नेविसंघका केशर राई र उर्लाबारी बहुमुखी क्याम्पस मोरङ्गको स्ववियु अध्यक्षमा नेविसंघका उम्मेदवार पोषण आचार्य निर्वाचित भए । महेन्द्र मोरङ क्याम्पस, विराटनगरमा मतगणना जारी छ ।