कस्तो छ आजको मौसम ?

काठमाडौं । पश्चिमी र स्थानीय वायुको आंशिक प्रभावका कारण आज ३ प्रदेशको उच्च क्षेत्रकाे केही स्थानमा वर्षा र हिमपातको सम्भावना रहेको छ ।

मौसम पूर्वानुमान महाशाखाका अनुसार बुधबार बिहान देशको पहाडी भू–भागमा आंशिक बदली रही बाँकी भू–भागमा मौसम मुख्यतया सफा रहेको छ ।

दिउँसो कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली र पहाडी क्षेत्रमा आंशिक बदली हुन सक्ने पूर्वानुमान छ । दिउँसो कोशी र मधेश प्रदेशका केही स्थानमा हावाहुरी चल्ने सम्भावना छ ।

गण्डकी, कर्णाली र सुदूरपश्चिम प्रदेशका पहाडी क्षेत्रका केही स्थानमा मेघगर्जन र चट्याङसहित हल्का वर्षाको सम्भावना रहेको छ । गण्डकी, कर्णाली र सुदूरपश्चिमका हिमाली क्षेत्रका १–२ स्थानमा हल्का हिमपातको सम्भावनासमेत छ ।

राति गण्डकी, कर्णाली र सुदूरपश्चिम प्रदेशमा आंशिक बदली रहने पूर्वानुमान छ। गण्डकी र कर्णाली प्रदेशका हिमाली भू–भागमा राति पनि हल्का हिमपात हुन सक्ने पूर्वानुमान गरिएको छ ।

वर्षा र हिमपातले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने सम्भावना रहेको महाशाखाले उल्लेख गरेको छ ।