कटहरीमा जीवन विकासको वित्तीय साक्षरता कार्यक्रम

विराटनगर । जीवन विकास लघुवित्त वित्तीय संस्थाको कटहरी शाखाले केन्द्र प्रमुख गोष्ठी तथा वित्तीय साक्षरता कार्यक्रम सम्पन्न गरेको छ । विश्व नगद सप्ताह (ग्लोबल मनी वीक २०२५) को अवसर पारेर मंगलबार कार्यक्रम आयोजना गरेको हो ।

३१ जिल्लामा १६० वटा शाखा कार्यालय मार्फत वित्तीय सेवा प्रवाह गरिरहेको जीवन विकासका शाखाले हरेक २–२ वर्षमा केन्द्र प्रमुख गोष्ठी तथा वित्तीय साक्षरता कार्यक्रम सञ्चालन गर्छन् ।

कार्यक्रमको उदघाटन शत्रमा बोल्दै कटहरी गाउँपालिका अध्यक्ष देवराज चौधरीले जीवन विकासले धेरै क्षेत्रमा उत्कृष्ट काम गरिरहेको बताए । लघुवित्तबाट निश्चित कामका लागि सदस्यले लिएको ऋणको सही सदुपयोग गर्नुपर्ने बताउँदै उनले उत्पादनमूलक क्षेत्रमा काम गर्न आग्रह गरे । जीवन विकासले शिक्षा, वातावरण संरक्षण र रोजगारी सिर्जनाको क्षेत्रमा राम्रो काम गरिरहेको उनको भनाई छ ।

कटहरी गाउँपालिका उपाध्यक्ष सीता राजवंशीले जीवन विकासको सहयोगमा धेरै परिवारले आर्थिक प्रगति गरेको बताइन् । संस्थाबाट लिएको ऋणलाई सही काममा लगाउन आग्रह गर्दै उनल ऋणको सही सदुपयोग गरे किस्ता तिर्न समस्या नपर्ने बताइन् ।

जीवन विकास लघुवित्त वित्तीय संस्थाका प्रमुख कार्यकारी अधिकृत संजयकुमार मण्डलले लघुवित्तले प्रवाह गर्ने सेवा सुविधालाई सही ढंगबाट उपभोग गर्न आग्रह गरे । केन्द्र (सदस्यहरुको समुह) लाई आर्थिक कारोबार गर्ने अधिकार रहेको बताउँदै उनले सदस्यहरुलाई ऋणको सदुपयोग गराउन केन्द्र प्रमुख र उपप्रमुखको भूमिका महत्वपूर्ण हुने बताए ।

श्री आधारभूत विद्यालय कटहरीका प्रधानाध्यापक बलबहादुर बस्नेत, कटहरी वडा नम्बर १ का वडाध्यक्ष हरि राजवंशीलगायतले जीवन विकासले नागरिकको आर्थिक तथा सामाजिक अवस्था उकास्नका लागि महत्वपूर्ण योगदान गरिरहेको बताएका थिए ।

केन्द्र प्रमुख गोष्ठीको अवसरमा जीवन विकासको कटहरी शाखाले ५ अतिविपन्न परिवारका ७ जना बालबालिकाको अभिभावकत्व लिएको छ । अभिभावकत्व ग्रहण गरेका बालबालिकाको अध्ययनका लागि हरेक वर्ष शैक्षिक सामग्री शाखाले उपलब्ध गराउने छ ।

सोही क्रममा उत्कृष्ट बचतकर्ता शकुन्तला दाहाल, शकुन्तला निरौला तथा राधीदेवी गनगाई र उत्कृट अधिकृत टेलर सदस्य संगीतादेवी शाह सोनारलाई पुरस्कृत गरेको थियो । त्यस्तै उत्कृष्ट ऋणी खुस्बु खातुन, सुशीला माझी र पदमाकुमारी मण्डललाई पनि पुरस्कृत गरेको छ । उत्कृष्ट उद्यमीको पुरस्कार उर्मिला साह, लक्ष्मी सिंह र तुलसा जातावालाले पाएकी छन् ।

कार्यक्रममा जीवन विकासको केन्द्र नम्बर ४१ सन्तोषी जीवन विकास उत्कृष्ट केन्द्र घोषित हुँदै प्रथम पुरस्कार प्राप्त गरेको छ । केन्द्र नम्बर ५७ को गौरी जीवन विकास केन्द्र दोस्रो, केन्द्र नम्बर ४२ नयाँ सरस्वती जीवन विकास केन्द्र तेस्रो भए । मुडियारी जीवन विकास केन्द्र र सरस्वती जीवन विकास केन्द्रले सान्त्वना पुरस्कार प्राप्त गरे ।

उत्कृष्ट बचत कर्ता, ऋणी, उद्यमी र केन्द्रलाई जीवन विकासका प्रमुख कार्यकारी अधिकृत संजयकुमार मण्डल र तालिम विभाग प्रमुख रञ्जना निरौलाले पुरस्कार प्रदान गरे । कार्यक्रममा उपस्थित केन्द्र प्रमुख तथा उपप्रमुखलाई निरौलाले वित्तीय साक्षरता सम्बन्धि प्रशिक्षण दिएकी थिइन् ।