धनपालथान आगलागी अपडेट : बेपत्ता बालक सकुशल भेटिए, एक बालिकाको मृत्यु

विराटनगर । मोरङको धनपालथान गाउँपालिका – ६ कदमाहामा भएको आगलागीका क्रममा बेपत्ता भएका बालक सकुशल फेला परेका छन् । एक जना बालिकाको भने जलेको अवस्थामा शव फेला परेको छ ।

धनपालथान– ६ को कदमाहा गाउँमा मंगलबार दिउँसो सुरु भएको आगलागीमा दुई बालबालिका परेकाे स्थानीयलाई उदृत गर्दै प्रहरीले बताएको थियो ।

आगलागीमा परेको भनिएका बालक सम्पर्कमा आएको मोरङ प्रहरी प्रवक्ता डिएसपी बेदप्रकाश जोशीले जानकारी दिए । अनित मियाकी ४ वर्षीय छोरी रेश्मा खातुनको शव फेला परेको छ ।

आगलागीमा परेको भनिएका अर्का ६ वर्षीय बालक अर्शद अली सम्पर्कमा आएका हुन् । उनी अनितका छाेरा हुन् ।

घटनास्थलमा रहेका माेरङका प्रमुख जिल्ला अधिकारी इन्द्रदेव यादवका अनुसार बालक घर नजिकै बारीमा सकुशल फेला परेका हुन् । उनकाे अवस्था सामान्य छ ।

प्रहरीका अनुसार आगलागीमा परी ९ वटा घर जलेका छन् । दमकल, सुरक्षाकर्मी र स्थानीयकाे प्रयासमा आगाे नियन्त्रणमा आएको हाे ।