‘बसाइँ’ लेखक लीलबहादुर क्षेत्रीको निधन

काठमाडाैं । नेपाली भाषाकाे चर्चित उपन्यास  ‘बसाइँ’का लेखक साहित्यकार लीलबहादुर क्षेत्रीको निधन भएको छ । फागुन २९ राति उनको गुवाहाटी भारत स्थित आफ्नै निवासमा निधन भएको हो । सन् १९३३ को १ मार्चका दिन गुवाहाटी टकौबारीमा जन्मिएका थिए ।

१६ वर्षको उमेरमा प्रकाशित पहिलो कविता ‘शिवस्तुति’ का माध्यमबाट नेपाली साहित्यजगतमा उनी उदाएका थिए । उनको पहिलो उपन्यास ‘बसाइँ’ २०१४ सालमा मदन पुरस्कार पुस्तकालयले प्रकाशित गरेको थियो । बसाइँ उनको सबैभन्दा चर्चित उपन्यास हो ।

साझा प्रकाशनले प्रकाशन गरेपछि यो कृति सर्वाधिक बिक्री हुने उपन्यास बनेको थियो । पाठ्यक्रममा समेत बसाइँ  उपन्यास छ । अंग्रेजीलगायत विभिन्न भाषामा अनुवाद भएको छ । उपन्यासकाे चलचित्र पनि बनेको छ ।

उनका ‘अतृप्ति’, ‘ब्रह्मपुत्रका छेउछाउ’, ‘प्रतिध्वनिहरू विस्मृतिका’ उपन्यासहरू प्रकाशित भए । उपन्यासका अतिरिक्त आख्यानको क्षेत्रमा उनका ‘तीन दशक बीस अभिव्यक्ति’, ‘लीलबहादुरका कथाहरू’ तथा ‘छरिएको बिस्कुन’ कथा कृतिहरू समेत प्रकाशित छन् ।

उनका ‘दोबाटो’, ‘माग’तथा ‘शुरुको शुरु’ नाट्य कृतिहरू समेत प्रकाशित छन् । ‘असममा नेपाली भाषाको साह्रो–गाह्रो’, ‘पूर्वाञ्चल भारतीय नेपाली कथा–साहित्य र पत्रकारिताको इतिवृत्त’, ‘झ्याउरे पार्टीमा लाग्दा’, ‘पूर्वोत्तर भारतीय नेपाली साहित्य र समाजको ऐतिहासिक दिग्दर्शन’, ‘सिमलको भुवा’, ‘अतीतका ऐनामा विविध झाँकीहरू’ लगायत गैरआख्यान कृति प्रकाशित छन् ।

उनको सबै उपन्यास एकसाथ ‘समग्र उपन्यास’का रुपमा प्रकाशित भएको थियो ।