अमेरिकासँगको छलफलपछि युद्धविराम गर्न युक्रेन तयार

काठमाडौं । रुससँग जारी युद्ध रोक्नका लागि युक्रेन तयार भएको छ । साउदी अरबमा अमेरिकी अधिकारीहरुसँग भएको वार्ताको क्रममा ३० दिनका लागि युद्धविराम गर्न युक्रेन तयार भएको हो ।

ह्वाइटहाउसको ओभल अफिसमा अमेरिकी राष्ट्रपति डोनाल्ड ट्रम्पसँग तनावपूर्ण छलफलपछि बाहिरिएका युक्रेनी राष्ट्रपति भ्लोदोमिर जेलेन्स्कीसँग अमेरिकी अधिकारीहरुले वार्ता गरेका थिए । वार्तामा अमेरिकाले राखेको ३० दिनको युद्धविराम प्रस्ताव युक्रेनले स्वीकार गरेको समाचारमा जनाइएको छ । अमेरिकाले युक्रेनलाई रोकेको सहायता जारी राख्ने र खनिज खानीसम्म अमेरिकाको पहुँच दिने विषयमा युक्रेन सहमत भएको छ ।

अमेरिकी विदेशमन्त्री मार्को रुबियोले युद्धविरामको प्रस्ताव युक्रेनले स्वीकार गरिसकेको भन्दै अब रुसले निर्णय गर्नुपर्ने बताए । रुस र युक्रेनबीच तीन वर्षदेखि युद्ध जारी छ । युद्धविरामको निर्णय लिनुअघि युक्रेनले रुसको राजधानी मस्कोमा २०० बढी ड्रोन प्रहार गरेको थियो ।