मुख्यमन्त्रीसँगकाे छलफलपछि प्रतिपक्षी दल बैठकमा बस्न तयार

विराटनगर । कोशी प्रदेशका मुख्यमन्त्री हिक्मतकुमार कार्की र प्रदेशको प्रमुख प्रतिपक्षी दल नेकपा माओवादी केन्द्र संसदीय दलका नेता इन्द्रबहादुर आङ्बाेबीचको छलफलपछि प्रतिपक्षी दल संसद बैठकमा सहभागी हुने भएका छन् । 

कोशीको प्रदेशसभा बैठकलाई आज प्रधानमन्त्री केपी शर्मा ओलीले सम्बोधन गर्ने कार्यसूची छ । प्रधानमन्त्रीले सम्बोधन गर्ने बेलामासमेत सरकारले समन्वयन नगरेको भन्दै माओवादी केन्द्रसहित प्रतिपक्षी दलले बैठक बहिष्कारको धम्की दिएका थिए । प्रतिपक्षीले बैठक बहिष्कार गर्ने बताएपछि मंगलबार बिहान आङ्बोसँगको भेटमा मुख्यमन्त्री कार्कीले प्रतिपक्षी दलहरुसँग छलफल नगर्नु कमजोरी भएको स्वीकार गरेपछि विवाद मिलेको हो । अब प्रधानमन्त्रीकाे सम्बाेधनका बेला प्रतिपक्षी दल सहभागी हुनेछन् ।

आङ्बोका अनुसार प्रधानमन्त्रीले संस्थागत ढंगले बोल्ने, कसैलाई घोचपेच नगर्ने र विपक्षी दलहरुलाई औपचारिक निमन्त्रणा नगरेको विषयमा मुख्यमन्त्रीले कमजोरी भएकाे भनि स्वीकार गरेका थिए ।

संसद बैठकमा सहभागी हुने विषयमा भने छलफलपछि निर्णय गर्ने उनले बताए । ‘हामीले जे कन्सन राखेका थियौं, त्यो कन्सन सम्बोधन गर्ने भइसकेपछि विषय सकारात्मक भयो,’ उनले भने,‘विपक्षी दलहरुसँग छलफल गरेर निर्णयमा पुग्छौं ।’

प्रधानमन्त्री ओलीले आज २ बजेपछि बस्ने प्रदेशसभाको बैठकलाई सम्बोधन गर्नेछन् ।