मानगढ खानेपानीको आयोजना : फेरि मतदान गर्न उच्च अदालतको आदेश

विराटनगर । मानगढ खानेपानी आयोजना विराटनगरको नयाँ नेतृत्वका लागि पुन: मतदान गर्न उच्च अदालत विराटनगरले आदेश दिएको छ ।  विराट खानेपानी तथा सरसफाइ उपभोक्ता संस्था अन्तर्गत मानगढ खानेपानी आयोजना सञ्चालित छ । संस्थाको नयाँ नेतृत्वका लागि गत १९ जेठमा मतदान भएको थियो । मतदानका क्रममा विवाद भएपछि सबै मतदाताले मत हाल्न पाएनन् ।

मतदान विथाेलिएपछि खसेको मतलाई नै गणना गर्नुपर्ने माग राख्दै दिव्य राज कट्टेलसमेत तीन जनाले उच्च अदालत विराटनगरमा रिट दायर गरेका थिए । टंकप्रसाद खतिवडासमेत तीन जनाले पुनः मतदानको मागसहित रिट दायर गरेको थियो । सोमबार उच्च अदालत विराटनगरका न्यायाधीश ध्रुवराज नन्द र विष्णुप्रसाद अर्यालको संयुक्त इजलासले खतिवडासहितको मागदाबी अनुसार नयाँ नेतृत्वका लागि पुनः मतदान गर्न रिट जारी गरेको हो ।

उच्च अदालत विराटनगरका रजिष्ट्रार जगदिशप्रसाद भट्टका अनुसार जेठ १९ गते बिहान ९ बजेको अवस्थाबाट पुन प्रक्रिया सुरु गर्न रिट जारी भएको छ । अर्थात उम्मेदवार पुरानै रहने र मतदान मात्रै पुन गर्नुपर्नेछ ।

विराट खानेपानी तथा सरसफाइ उपभोक्ता संस्थाको नयाँ नेतृत्वका लागि वर्तमान अध्यक्ष रामबहादुर घिमिरे र लालमणि भट्टराई अध्यक्षका उम्मेदवार थिए । दुवै जना नेकपा (एमाले)का स्थानीय नेता हुन् ।

सोही खानेपानीको निर्वाचनमा एमाले मोरङ नेतृत्व २ धारमा बाँडिएको थियो । माेरङ अध्यक्ष ऋषिकेश पोखरेलसहितको संस्थापन समूहले घिमिरेलाई अघि सारेको थियो । विनोद ढकालको समूहले भट्टराईलाई अघि सारेको थियो ।

निर्वाचनका क्रममा पार्टीको आधिकारिक उम्मेदवार विरुद्ध खटिएको भन्दै एमालेले महानगर कमिटी अध्यक्ष सागर थापालाई जिम्मेवारीबाट हटाएको थियो । नगर कमिटीका अन्य नेताकाे पनि जिम्मेवारी खाेसेकाे थियाे । भर्खरै सम्पन्न १० औं जिल्ला अधिवेशनबाट थापा मोरङ उपाध्यक्षमा निर्वाचित भइसकेका छन् ।

५ हजार ९ सय घरधुरी सदस्य रहेको खानेपानी व्यवस्थापनका लागि गत १९ जेठमा मतदानका क्रममा विवाद भएकाे थियाे । उपभोक्ता समितिको विवाद अदालतमा पुगेर टुङ्गो लागेको हो । अब नयाँ नेतृत्वका लागि पुन मतदान हुनेछ ।