माेरङमा बाख्रा खोज्ने क्रममा करेन्ट लागेर नातिनीको मृत्यु, हजुरबुवा घाइते

विराटनगर । मोरङको मिक्लाजुङमा बाख्रा खोज्ने क्रममा एक जनाको करेन्ट लागेर मृत्यु भएको छ । एक जना घाइते भएका छन् ।

प्रहरीका अनुसार करेन्ट लागेर मिक्लाजुङ गाउँपालिका–१ चित्रेकी १८ वर्षीया अनामिका राईको मृत्यु भएको हो ।

मोरङ प्रहरीका प्रवक्ता डीएसपी वेदप्रकाश जोशीका अनुसार अनामिकाको बाख्रा शनिबारदेखि नै हराएको थियो । हजुरबुवा धनवीर राईलाई लिएर बाख्रो खोज्न निस्किएकी अनामिकाले खोजी गर्दै जाने क्रममा बिजुलीको पोलमुनि बाख्रा लडेको देखिन् । बाख्रोलाई हतारहतार तान्ने क्रममा करेन्ट लागेर उनको मृत्यु भएको हो ।

मृत बाख्रोलाई तान्ने क्रममा अनामिकालाई दिउँसो १ः३० बजेतिर करेन्ट लागेको थियो ।करेन्ट लागेर अनामिकाको घटनास्थलमै मृत्यु भयो ।

अनामिकालाई करेन्ट लागेपछि उनलाई जोगाउन हजुरबुवा धनवीर पनि पुगेका थिए । नातिनीलाई जोगाउन जाँदा हजुरबुवालाई पनि सामान्य करेन्ट लागेको प्रहरीले बताएको छ । हजुरबुवाको अवस्था भने सामान्य छ ।

प्रहरीका अनुसार अनामिकाकै बारी हुँदै लगिएको १२ हजार भोल्ट करेन्ट प्रवाह भइरहेको बिजुलीको ‘ब्यारेल’ भाँचिएर पोलबाट विद्युत ‘लिक’ भएको प्रारम्भिक अनुसन्धानबाट खुलेको छ । पोलबाट ‘लिक’ भएको करेन्टले बाख्रो मरेको र सोही बाख्रालाई तान्ने क्रममा युवतीको पनि मृत्यु भएको प्रहरीले बताएको छ ।