माेरङमा एउटै डोरीको पासोमा भेटियो युवा–युवतीको शव

विराटनगर । मोरङको पथरीशनिश्चरेमा एउटै डोरीले पासो लागेको अवस्थामा महिला पुरुषको शव फेला परेको छ ।

पथरीशनिश्चरे नगरपालिका–५ मौलीबारीस्थित बक्राहा खोलाको किनारमा रहेको पिठारीको रूखको एउटा हाँगोमा सँगै झुन्डिएको अवस्थामा पथरीशनिश्चरे–५ का अन्दाजी २४ वर्षीय अजय टुडू र झापाको गौरीगन्ज गाउँपालिका–२ की जुबामुनी हस्ता मृत भेटिएका हुन् ।

जिल्ला प्रहरी कार्यालय मोरङका प्रमुख नारायण चिमरीयाका अनुसार मृतक दुवै विवाहित हुन् ।

मृत फेला परेकी जुबामुनीका पति वैदेशिक रोजगारीको सिलसिलामा विदेशमा छन् । घरमा एक वर्षकाे छाेरा छ । अजय दुई छोराछोरी छन् । प्रहरीका अनुसार अजयले जुबामुनीलाई आइतबार राति आफ्नै घरमा लिएर आएका थिए । भोलिपल्ट उनीहरु घरबाट हिडेका थिए । आज भने एउटा रुखमा झण्डिएको अवस्थामा मृत फेला परेका हुन् ।

प्रेम सम्बन्धमा समस्या उत्पन्न हुनसक्ने देखेपछि दुवै जनाले सल्लाहमै आत्महत्या गरेको जस्तो देखिएको प्रहरीले बताएको छ ।