एमाले मोरङ जिल्ला अधिवेशन : नयाँ नेतृत्वका लागि आज मतदान

विराटनगर । नेकपा (एमाले) मोरङको जारी १० औं अधिवेशनमा आज नयाँ नेतृत्व चयनका लागि मतदान हुँदै छ ।

जिल्लाकाे नयाँ नेतृत्वका लागि दुई पक्ष प्यानल बनाएर मैदानमा उत्रिएको छ । संस्थापन पक्षबाट अध्यक्षमा राजकुमार ओझा, उपाध्यक्षमा शान्ति लिम्बू भुजेल, सचिवमा रविन थापा, उपसचिवमा शिल्पा निराला कार्की र ईर्जालाल राजवंशीको उम्मेदवार छन् ।

विनोद ढकालले नेतृत्व गरिरहेको इतर पक्षबाट अध्यक्षमा अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष वान्तवा र उषा झा उम्मेद्वार छन् । इतर पक्षको नेतृत्व गरिरहेका ढकाल पूर्वराष्ट्रपति विद्यादेवी भण्डारी निकट हुन् ।

अधिवेशनबाट १ सय ६५ सदस्यीय कमिटी चयन हुनेछ । दुवै पक्ष पदाधिकारीदेखि सदस्यसम्म प्यानल बनाएर मैदानमा उत्रिएका छन् । अधिवेशनका लागि ९ सय ११ जना प्रतिनिधि मतदाता छन् । प्रमुख निर्वाचन अधिकृत सुरेशलाल श्रेष्ठका अनुसार आज ९ बजेपछि मतदान सुरु हुनेछ । मतदानपछि मतगणना सुरु गर्ने तयारी छ ।

फागुन १७ गते शनिबारदेखि सुरु भएको १० औं अधिवेशन सोमबार सम्पन्न गर्ने तयारी थियो । तर, मनोनित प्रतिनिधिको विषयमा विवाद बढेपछि लम्बिएको हो ।