चाँदनी यादव हत्या प्रकरण : आमाबुबासहित ६ जना कारागार चलान

विराटनगर । विराटनगरमा खाल्डोमा गाडिएको अवस्थामा फेला परेकी भारत छपरा जिल्लाकी १४ वर्षीया चाँदनी यादवको हत्यामा संलग्न भएको आरोपमा पक्राउ परेका ६ जना कारागार चलान गरिएको छ । जिल्ला अदालत मोरङका न्यायाधीश मनिराम ज्ञवालीको इजलासले आइतबार पुर्पक्षका लागि कारागार चलानको आदेश दिएको हो ।

आदेशलगत्तै अभियुक्तहरुलाई जिल्ला कारागार मोरङ चलान गरिएको अदालतका सूचना अधिकारी हेमबहादुर बुढाथोकीले बताए । प्रेम सम्बन्धका कारण ज्यान गुमाएकी चाँदनीको हत्यामा आफ्नै अभिभावक र मावली परिवारका सदस्यको संलग्नता हत्या भएको थियो ।

उनकोे हत्या आफ्नै आमा ३५ वर्षीया राजकुमारी राय यादव र मामा रामबाबु मण्डलले गरेका थिए । चाँदनीका मावली हजुरबुवा ५५ वर्षीय सुरयुग मण्डल, हजुरआमा (सरयुगकी पत्नी) ५४ वर्षीया बतासी मण्डल, माइजू जानकी र चाँदनीका बुवा ४० वर्षीय लालमन राय यादवको मिलेमतो देखिएको प्रहरीले बताएको छ ।

प्रहरीले अनुसन्धान प्रतिवेदनका आधारमा ६ जनाविरुद्ध जिल्ला अदालत मुद्दा दायर गरेको थियो । आरोपीको बयानपछि थुनछेक आदेश भएको हो । आमा र मामाविरुद्ध कर्तव्य ज्यान तथा अरु ४ जनालाई मतियार बनाएर मुद्दा दर्ता भएको थियो ।

विराटनगर महानगरपालिका–५ विशाल चोकको कलेर्वा टोलस्थित मावली घरभित्र चाँदनीको माघ ११ गते दिउँसो हत्या गरेपछि राति मामाघरनजिकै खाल्डो खनेर गाडिएको थियो । प्रहरीले माघ १८ गते उनको शव फेला पारेको थियो ।

भरतको छपरा घर भएकी चाँदनीको करिब समान उमेर भएका भारतीय बालकसँग प्रेम सम्बन्ध रहेको खुल्यो । केही समयअघि भागेर बिहेसमेत गरेका थिए । छुटाएर घर फर्काएपछि बाबुआमा पुसको पहिलो साता विराटनगरस्थित मावली घरमा चाँदनीलाई ल्याएका थिए । विराटनगर आएकै भोलिपल्ट बुवा लालमन भारतस्थित घर फर्किए । आमा राजकुमारी छोरी चाँदनीलाई लिएर माइतीमै बसेकी थिइन् । छोरीको हत्यापछि शव व्यवस्थापन गरेकै भोलिपल्ट उनी घर फर्किएकी थिइन् । छाेरीकाे शव फेला परेपछि प्रहरीले दुवैजनालाई नेपाल ल्याएकाे थियाे ।