एमाले मोरङ अधिवेशन : प्रतिनिधिको विवाद टुङ्गो लागेन, निर्वाचन कार्यतालिका सार्वजनिक

विराटनगर । नेकपा एमाले मोरङ जिल्लाको दशौं अधिवेशनका लागि मनोनित भएका प्रतिनिधिको विषयमा देखिएको विवाद टुङ्गो नलागी निर्वाचन कार्यतालिका सार्वजनिक छ । निर्वाचन समितिले प्रकाशित गरेको कार्यतालिका अनुसार आज बिहान ८ बजेबाट निर्वाचन प्रकृया प्रारम्भ हुनेछ ।

निर्वाचन कार्यतालिका सार्वजनिक भएपनि अधिवेशनका लागि मनोनित भएका ४६ जना प्रतिनिधिको विवाद नमिलेको नेताहरुले बताएका छन् ।

आइतबार बन्दसत्रमा ४६ जना प्रतिनिधि एकलौटी रुपमा मनोनित गरेको भन्दै इतर समूहले प्रदर्शन गरेको थियो । प्रदर्शनका उग्र बनेपछि बन्दसत्र रोकेर नेताहरु छलफलमा बसेका थिए । तर मनोनित प्रतिनिधिको विषयमा कुनै सहमति भएन । आज बिहान बैठक बस्ने भन्दै नेताहरु अधिवेशन स्थलबाट बाहिरिएका थिए ।

प्रतिनिधि मनोनित गरेको विवाद टुङ्गो नलगाइ निर्वाचन कार्यतालिका सार्वजनिक भएपछि इतर समूह असन्तुष्ट बनेको छ ।

निर्वाचन समितिले सार्वजनिक गरेको कार्यतालिका अनुसार आज बिहान १० बजेपछि मनोनयन गर्न तयारी छ । दिउँसो ३ बजेदेखि ५ बजेसम्म नयाँ नेतृत्वका लागि मतदान गर्ने कार्यसूची छ । मतदानपछि पार्टी कार्यालय पाञ्चनालीमा मतगणना हुनेछ ।

जिल्ला अधिवेशनमा संस्थापन र इतर पक्षको नाममा दुई वटा प्यानल बनेको छ । संस्थापन पक्षमा अध्यक्ष केपी शर्मा ओली निकट नेताहरु छन् । इतर पक्षको नेतृत्व विनोद ढकालले गरेका छन् ।

संस्थापन पक्षले राजकुमार ओझालाई जिल्ला अध्यक्षमा अघि सार्ने तयारी गरेको छ । विनोद ढकालको समूहले अजम्बर राईलाई जिल्ला अध्यक्षको रुपमा अघि बढाउने तयारी गरेको छ । यो समूहले उपाध्यक्षमा सागर थापालाई अघि सार्ने तयारी गरेको छ ।

ढकालको समूहले सचिवमा सोमराज थापालाई अघि सार्ने तयारी गरेको छ । यो समूहबाट उपसचिवमा उषा झा र सन्तोष वान्तवालाई अघि बढाउने तयारी रहेको ढकालनिकट नेताहरुले बताए ।

संस्थापन पक्षले उपाध्यक्षमा शान्ति भुजेललाई उम्मेवार बनाउने तयारी गरेको छ । यो समूहबाट रविन थापा सचिवको उम्मेदवार बन्ने छन् । अधिवेशनले १ सय ६५ सदस्यीय नयाँ नेतृत्व चयन गर्नेछ । जिल्ला अधिवेशनका लागि ९ सय १४ जना प्रतिनिधि छानिएका छन् ।