हिउँदे वर्षा र हिमपात रोकियो, कस्तो छ आजको मौसम ?

काठमाडौं । पश्चिमी न्यूनचापीय प्रणालीको प्रभावका कारण दुई दिनदेखि जारी हिउँदे झरी र हिमपात लगभग राेकिएकाे जल तथा मौसम विज्ञान विभागले जनाएको छ ।

विभागका अनुसार पछिल्लो २४ घण्टाको अवधिमा देशभर हल्कादेखि मध्यम वर्षा भएको छ । शुक्रबारदेखि सुदूरपश्चिमबाट सुरु भएको हिउँदे वर्षा गराउने प्रणाली पूर्वतर्फ सर्दै गएको थियो । यो प्रणाली नेपालभरबाट बाहिरिइसकेको छ ।

बरिष्ठ मौसमविद शान्ति कँडेलका अनुसार मौसममा आजबाट सुधार भइसकेको छ । विभागका अनुसार आज कोशी, बागमती र गण्डकी प्रदेशका पहाडी भू–भागमा आंशिक बदली रही बाँकी भू–भागमा मौसम मुख्यतया सफा रहनेछ।