ट्रम्प र जेलेन्स्कीबीचको विवादपछि खनिज सम्झौता अन्योल

काठमाडौं । अमेरिका भ्रमणमा पुगेका युक्रेनी राष्ट्रपति भोलोदिमिर जेलेन्स्की ह्वाइट हाउसमा अमेरिकी राष्ट्रपतिसँगको भेटमा अपमानित हुँदै बाहिरिएका छन् ।

अमेरिकासँग मतभेद अन्त्य गरी सम्बन्ध सुधार गर्ने योजनासहित जेलेन्स्कीले पुगेका थिए । ह्वाइट हाउसमा राष्ट्रपति डोनाल्ड ट्रम्प र उपराष्ट्पति जेडी भान्ससँग जेलेन्स्कीको भनाभन भयो ।

ट्रम्पले जेलेन्स्कीलाई करोडौं मानिसहरूको जीवनमा खेलवाड गरेको र तेस्रो विश्वयुद्ध निम्त्याउन खोजेको आरोप लगाए। जेलेन्स्कीले त्यसको खण्डन गरे।

द्वीपक्षीय छलफलको भिडिओ अन्तर्राष्ट्रिय सञ्चारमाध्यमहरूले सार्वजनिक गरेका छन् । छलफलका क्रममा राष्ट्रपति ट्रम्प र उपराष्ट्रपति भान्सले विभिन्न आरोप लगाएपछि जेलेन्स्की दुवैलाई जबाफ फर्काएका थिए ।

दुई राष्ट्रप्रमुखहरूबीचको चर्काचर्कीपछि संयुक्त पत्रकार सम्मेलन पनि स्थगित गरिएको थियो ।

त्यसपछि अमेरिकी अधिकारीहरूले जेलेन्स्की र युक्रेनी अधिकारीहरूलाई ह्वाइट हाउस छाड्न निर्देशन दिएको अमेरिकी अखबार द न्यूयोर्क टाइम्सले जनाएको छ।

ह्वाइट हाउस छाड्न भनेपछि जेलेन्स्की निराश मुद्रामा ओभल अफिसबाट बाहिरिएको भनेर न्युयोर्क टाइम्सले लेखेको छ। ह्वाइट हाउसबाट बाहिरिएपछि जेलेन्स्कीले एक्समा लेख्दै ट्रम्प र अमेरिकालाई धन्यवाद भनेका छन् ।

ट्रम्प र जेलेन्स्कीबीच ह्वाइट हाउसमा खनिज सम्झौतामा हस्ताक्षर हुने भनिएको थियो । तर दुई देशको नेतृत्वबीचको चर्काचर्कीपछि खनिज सम्झौता अन्योलमा परेको छ । चर्काचर्कीपछि बाहिरिएका जेलेन्स्कीले अमेरिकासँग अझै सम्बन्ध सुधारको प्रयास गर्ने बताएका छन् ।