आज र भाेलि हिउँदे वर्षाकाे सम्भावना

काठमाडौं । आज बिहीबार र शुक्रबार मुलुकका धेरै ठाउँमा मेघ गर्जन र चट्याङसहित वर्षा हुनसक्ने सम्भावना मौसम पूर्वानुमान महाशाखाले जनाएकाे  छ ।

हिउँदे अवधि सकिनलाई २ दिन बाँकी छ । यसवर्षको हिउँदे अवधि शुक्रबार सकिन्छ । यो अवधिमा पश्चिमी वायु सक्रिय भएको छ । वायुका कारण वर्षा र हिमपात हुनसक्ने अनुमान गरिएको हो ।

महाशाखाका अनुसार उच्च पहाडी तथा हिमाली भेगमा हिमपातको सम्भावना छ । मधेश प्रदेशबाहेकका अरु ठाउँमा मेघगर्जन र चट्याङसहित पानी पर्नसक्ने पूर्वानुमान गरिएको छ ।

हिउँदयाम भनेको मंसिर १६ देखि फागुन १६ गतेसम्मको अवधि हो । यस अवधिमा सरदर ६० मिलिमिटर वर्षा हुने गरेको थियो । यसपटक निक्कै कम वर्षा भएको छ । झण्डै १० मिलिमिटर मात्रै वर्षा भएको महाशाखाले जनाएको छ ।

लामो समयदेखि हिउँदे वर्षा नहुँदा सुक्खा बढेको छ । यसले वायुमण्डलमा धुवाँ, धुलो थुप्रिँदा वायु अस्वस्थकर हुने लगायत समस्या देखिएको छ । वर्षाले प्रदूषण हटाउन सहयोग पुग्ने अनुमान गरिएको महाशाखाले जनाएको छ ।