कानेपोखरीकाे केन्द्र सर्‍यो

विराटनगर । मोरङको कानेपोखरी गाउँपालिकाको कार्यालय सरेको छ । कानेपोखरी गाउँपालिका– ६ रमाइलोमा रहेको कार्यालय कानेपोखरी गाउँपालिका– ५ मा भाैसबारीमा सरेको हो ।

कार्यपालिकाको कार्यालयबाट प्रवाह हुने सेवाहरु अब कानेपोखरी गाउँपालिका– ५ भौसाबारी स्थित ५ नम्बर वडा कार्यालयको भवनबाट प्रवाह हुनेछ ।

तत्कालिन बयरबन गाबिसको सदरमुकाम बयरबन बजार थियो । बयरबनबाट रमाइलोमा सारिएको थियो । स्थानीय तह गठन हुँदा बनेको कानेपोखरी गाउँपालिकाको कार्यालय पनि रमाइलोमा नै राखिएको थियो ।

२०८० बैशाख १७ गतेको गाउँसभाले मतदान गरी गाउँपालिकाको केन्द्र  भाैसबारीमा सार्ने प्रस्ताव पारित गरेको थियो  त्यसपछि पालिकाले कार्यालय सार्नका लागि मन्त्रीपरिषदमा सिफारिस गरेको थियो । गत पुस १६ गतेको बसेको मन्त्रीपरिषद् बैठकले कार्यालय सार्न स्वीकृत दिने निर्णय गरेको थियो। जसको सूचना माघ ७ गते राजपत्रमा प्रकाशित भयो ।

फागुन १३ गते बसेको कार्यपालिका बैठक फागुन १५ गते बिहीबारबाट कानेपोखरी गाउँपालिका गाउँ कार्यपालिकाको कार्यालयबाट प्रवाह हुने सेवाहरु अर्को व्यवस्था नभएसम्म तत्कालका लागि कानेपोखरी गाउँपालिका– ५ भौसाबारी स्थित ५ नम्बर वडा कार्यालयको भवनबाट प्रवाह गर्ने निर्णय गरेको हो ।