शून्यबाट करोडसम्म शर्माको प्रगति (भिडियाे)

विराटनगर । विराटनगर महानगरपालिका– ६ सरोचियाका सेठुवा शर्माले गार्मेन्ट उद्योग सुरु गरेको १६ वर्ष भयो । करिब पाँच वर्ष उनले अरुको उद्योगमा मजदुरी गरेका थिए । त्यसबेला उद्योग सुरु गर्नका लागि शर्मासँग लगानी गर्ने पैसा थिएन। उधारोमा कपडा ल्याएर सुरु गरेको उद्योगलाई विस्तार गर्दै उनले दुई करोड हाराहारी पुर्याएका छन् । उद्योगमा १३–१४ जनालाई नियमित रोजगारी दिएका छन् ।

भाडाको कोठाबाट सुरु गरेका उद्योगका लागि अहिले छुट्टै संरचना बनाइ सकेका छन् । गार्मेन्ट उद्योगकै आम्दानीबाट उनले घर पनि बनाएका छन् । ‘ सुरुमा केही थिएन, शून्यबाट सुरु गरे, आफै काम गरे,’ उनी भन्छन्,‘ काम बढ्दै गएपछि मान्छे राखेर काम गरे ।’
अहिले उनको उद्योगमा २१–२२ वटा मेसिन राखेर काम गराइरहेका छन् ।

उनलाई व्यवसाय सञ्चालनका लागि जीवन विकास लघुवित्त वित्तीय संस्थाले ऋण सहयोग गरिरहेको छ । उनकी श्रीमती रन्जुदेवी एक दशकदेखि जीवन विकासको सदस्य छिन् । ‘जीवन विकासको सहयोग राम्रो छ, मैले त्यहाँ (जीवन विकासं) बाट व्यवहार चलाएको छु,’ उनी भन्छन् ,‘भनेको बेला सहयोग गरेको छ ।’

शर्माको उद्योगमा सिजन अनुसार नयाँ डिजाइनका कपडा उत्पादन हुन्छ । उत्पादित कपडा देशका विभिन्न बजारमा पुग्छ । उनले कपडा बिक्रीका लागि विराटनगरमा आफ्नै होलसेल पसल पनि खोलेका छन् ।

उनले गार्मेन्ट उद्योगलाई व्यवस्थित बनाएर विस्तार गर्दै लैजाने योजना पनि बनाएका छन् । उनी भन्छन् अझै ३०–४० जनालाई रोजगारी दिने सोच छ ।’