प्रहरी निरीक्षक महतको मृत्यु अनुसन्धानका लागि अर्का प्रहरी निरीक्षक पक्राउ

काठमाडौं । सशस्त्र प्रहरी बलकी इन्स्पेक्टर सन्तोषी महतको आत्महत्या दुरुत्साहन अनुसन्धानका लागि सशस्त्र प्रहरी कै इन्स्पेक्टर विवेक जोशी पक्राउ परेका छन् ।

ब्यारेकमै झुन्डिएको अवस्थामा मृत भेटिएकी सन्तोषीको परिवारले जोशीविरुद्ध आत्महत्या दुरुत्साहनमा किटानी जाहेरी दिएका थिए । त्यसपछि जोशीलाई नियन्त्रणमा लिइएको जिल्ला प्रहरी कार्यालय कास्कीका डीएसपी वसन्त शर्माले जानकारी दिए ।

पक्राउ परेका इन्स्पेक्टर २३ नम्बर गण तनहुँमा कार्यरत छन् । उनी १६ बेसिकका इन्स्पेक्टर हुन् । जोशी र सन्तोषी प्रेमी–प्रेमिका रहेको परिवारको दाबी छ ।

यो घटनाको छानबिन गर्न सशस्त्र प्रहरी हेडक्वाटरले समेत राष्ट्रिय सशस्त्र प्रहरी प्रशिक्षण प्रतिष्ठान मातातीर्थमा कार्यरत डीआईजी लक्ष्मण सिंहको नेतृत्वमा छानबिन समिति पनि गठन गरेको छ ।