सरकारले ‘नो केबलकार पक्ष’लाई वार्तामा बोलायो

विराटनगर । पाथीभरा क्षेत्रमा केबलकार निर्माण रोक्न माग गर्दै आन्दोलन गरिरहेको ‘नो केबलकार’ समूहलाई सरकारले वार्तामा बोलाएको छ ।

नो केबलकार समूहले यसअघि प्रेमप्रसाद भट्टराईको नेतृत्वमा गठन गरेको वार्ता समितिसँग वार्ता गरेको थियो । सो समितिसँगको वार्तामा सहमति नभएपछि मन्त्रीस्तरको समितिसँग मात्रै वार्ता गर्ने अडान राखेर आन्दोलनमा होमिएको थियो ।

बिहीबार पाथीभरा क्षेत्र र शनिबार फुङलिङ बजारमा प्रहरी र आन्दोलनरत पक्षबीच झडप भएको थियो ।

आइतबार प्रतिनिधिसभा र कोशी प्रदेशसभा बैठकमा सांसदहरुले पाथीभरा केलबकार विवाद समाधान गर्न सांसदहरुले माग गरेका थिए । सोमबार भट्टराई नेतृत्वको समितिले वार्तामा आउन आग्रह गरेको हो ।

वार्ता टोलीका तर्फबाट जारी गरिएको विज्ञप्तिमा आन्दोलनरत पक्षबाट उठाइएका सामाजिक, धार्मिक, सांस्कृतिक तथा स्थानीय समुदायका समस्याको वार्ताको माध्यमबाटै हल गरिने उल्लेख गरिएको छ।

पाथीभरा क्षेत्रमा केबलकारको विरोधमा आन्दोलन चर्किएपछि सरकारले गत माघ २० गते वार्ता टोली गठन गरेको थियो । माघ २२ गते आन्दोलनरत पक्ष र सरकारी वार्ता टोलीबीच ६ बुँदे सहमति भएको थियो । सो सहमति पछि माघ १५ गतेदेखि नो केबलकार पक्षले घोषणा गरेको यातायात बन्द फिर्ता भएको थियो ।

माघ २७ गते सरकारी वार्ता टोली र आन्दोलनरत पक्षबीचको वार्ता भाडिएको थियो । त्यसपछि आन्दोलनरत पक्षले मन्त्रीस्तरको वार्ता समितिसँग मात्रै छलफल गर्ने बताउँदै आएका छन् । उनीहरुले माघ २८ गते आन्दोलरत पक्षले गृहमन्त्री रमेश लेखकसँग भेटेका थिए । लेखकले सहसचिव भट्टराई नेतृत्वको वार्ता टोलीसँग छलफल गर्न भनेका थिए । त्यसपछि असन्तुष्ट भनेको आन्दोलनरत पक्ष पाथीभरा क्षेत्रमा पदयात्रा गरेकाे थियो ।