मोरङमा भारी हिउँदे वर्षा

काठमाडौं । जल तथा मौसम विज्ञान विभागका अनुसार गत २४ घण्टामा देशका विभिन्न स्थानमा हल्का, मध्यमदेखि अति भारी वर्षा भएको छ ।

विभागका विभिन्न स्टेशनमध्ये मोरङको केराबारी स्टेशनमा अत्यधिक वर्षा ४०१‍.२ मिलिमिटर मापन भएको छ ।

केराबारिमा मापन भएको अति भारी वर्षा हो । २४ घण्टाको अवधिमा २०० मिलिमिटरभन्दा धेरै वर्षा हुनुलाई अति भारी वर्षा भएको मानिन्छ ।

पछिल्लो २४ घण्टामा सप्तरीको रुपनी बजारमा मध्यम वर्षा भएको छ । रुपनीमा ३६ .४ मिलिमिटर वर्षा भएको हो । सप्तरीकै बरमझियामा १९.६ मिलिमिटर वर्षा मापन भएको छ ।

मकवारपुर र र प्यूठानमा पनि मध्यम वर्षा भएको छ । सिन्धुली, दोलखा र कास्की लगायतका जिल्लामा हल्का वर्षा भएको विभागले जनाएको छ ।

आज कोशी प्रदेशसहित पहाडी भू–भागमा आंशिकदेखि साधारण बदली भएको मौसम पूर्वानुमान महाशाखाले जनाएको छ ।

मौसमी भाषामा आंशिक बदली हुनु भनेको आकाशमा ५० प्रतिशतसम्म बादल देखिनु हो भने साधारण बदली भनेको ७५ प्रतिशतसम्म आकाश बादलले ढाकिनु हो । आज मधेशबाहेकका बाँकी ६ प्रदेशका केही भू–भागमा चट्याङसहित वर्षा र हिमपातको सम्भावना रहेको छ ।