च्याम्पियन्स ट्रफीमा अस्ट्रेलियाको कीर्तिमानी जित

काठमाडौं । अस्ट्रेलियाले आईसीसी च्याम्पियन्स ट्रफी क्रिकेटमा कीर्तिमानी जित निकालेको छ । शनिबार भएको समूह बीको खेलमा इंग्ल्याण्डमाथि कीर्तिमानी जित निकालेको हो ।

इंग्ल्याण्डले दिएको ३५२ रनको विशाल लक्ष्य अस्ट्रेलियाले ४७.३ ओभरमा ५ विकेटको क्षतिमा भेट्टायो । योसँगै अस्ट्रेलियाले आईसीसी प्रतियोगिताकै इतिहासमा सबैभन्दा धेरै रनको टार्गेट पुरा गरेर कीर्तिमान पनि बनायो ।

जोश इङ्लिसले अविजित १२० रन जोडे । त्यस्तै एलेक्स क्यारीले ६९ र म्याथ्यु शर्टले ६३ रन बनाए ।

त्यसअघि टस हारेर पहिले ब्याटिङ गरेको इंग्ल्याण्डले ५० ओभरमा ८ विकेट गुमाएर ३५१ रन बनाएको थियो । बेन डकेटले १६५ रनको शानदार पारी खेलेका थिए । जो रुटले ६८ रन बनाएका थिए ।

जितसँगै अस्ट्रेलियाले २ अंक जोडेको छ । समूह बी मा समान २ अंक भएको दक्षिण अफ्रिका नेट रनरेटका आधारमा अगाडि छ ।