चालक कुटपिटकाे विराेधमा ताप्लेजुङ बन्द आह्वान

काठमाडाैं । सवारी चालकलाई कुटपिट गरेको विरोधमा ताप्लेजुङ पाथीभरा यातायात सेवा प्रालिले आज शुक्रबारबाट अनिश्चितकालिन यातायात बन्दको आवह्वान गरेकाे छ ।

व्यवसायीले मेची राजमार्ग, तमोर करिडोर र तेह्रथुमबाट ताप्लेजुङ छिर्ने नाका र ताप्लेजुङका शाखा सडकमा यातायात बन्दको आवह्वान गरेका हुन् ।

बिहीबार प्रहरी र नाे केबलकार पक्षबीच झडप भएकाे थियाे । झडपमा घाइते भएकाहरुको उद्धार तथा उपचारको सहजीकरणका लागि फुङलिङबाट पाथीभरा केवलकारको निर्माणाधीन बेस स्टेशनतर्फ गएको अधिकारकर्मी, व्यवसायी र रेडक्रसकर्मी चढेको सवारी ‘नो केवलकार’पक्षका कार्यकर्ताले तोडफोड गरी चालकलाई कुटपिट गरेको विरोधमा यातायात बन्दको घोषणा भएको हो ।

नो केबलकार समूहले आक्रमण गर्दा मे १ ज २५७९ नम्बरको सवारीका चालक ४३ वर्षीय राजकुमार पौडेल घाइते भएका थिए । उनलाई कुटपिट गरेको विरोधमा पाथीभरा यातायात सेवा प्रालिले बन्द आह्वान गरेको हो । उनीहरुले तोडफोड र कुटपिटमा संलग्नलाई कारबाही गर्नु पर्ने,घाइतेको उपचार र सवारी साधनको मर्मतको माग गरेका छन् ।

मुक्कुमलुङ पदयात्राको अन्तिम दिन बिहीबार ‘नो केवलकार’पक्षधरहरु निर्माणाधिन बेस स्टेशनतर्फ जान खोजेपछि भएको झडपमा बिहीबार १३ जना घाइते भएका थिए । घाइतेको उद्धारका लागि फुङलिङबाट गएको रेडक्रस सभापति इन्द्रबहादुर गुरुङ,ताप्लेजुङ उद्योग बाणिज्य संघका महासचिव कमल लिम्बू र इन्सेक प्रतिनिधि एलिना दियाली चढेको सवारी आन्दोलनरत पक्षले तोडफोड गरी चालक पौडेललाई कुटपिट गरेको थियो ।