‘उपद्रष्टा हर्कमान तामाङ’बिमोचन

विराटनगर । पूर्वसांसद हर्कमान तामाङको जीवनीमा आधारित पुस्तक ‘उपद्रष्टा हर्कमान तामाङ’ बिमोचन भएको छ ।

८४ वर्षीय तामाङ अहिले सामान्य जीवन बिताइरहेका छन् । तामाङको जीवनीका विषयमा पत्रकार तथा साहित्यकार केशु विरहीले लेखेको पुस्तक बिमोचन भएको हो ।

पुस्तकमा तामाङको राजनीतिक, शैक्षिक, सामाजिक तथा सांस्कृतिक विषय समेटिएको छ ।

तामाङको जीवनीलाई आधार बनाएर उक्त पुस्तक तयार गरिएको विरहीले बताए । तामाङ २०४८, २०५१ र २०५६ सालमा मोरङको निर्वाचन क्षेत्र नम्बर ३ (साविकको क्षेत्र नम्बर ४)बाट सांसद निर्वाचित भएका थिए ।

तामाङका बारेका तयार पारेको पुस्तकको बिक्रीबाट प्राप्त भएको मध्ये ५० प्रतिशत रकमले बेलबारीमा अक्षयकोष निर्माण गर्ने र यसबाट प्राप्त ब्याजबापतको रकमले अनुसन्धानका क्षेत्रमा काम गर्ने व्यक्तिलाई पुरस्कृत गरिने विरहीले बताए ।

अक्षयकोष बेलबारी बहुमुखी क्याम्पसमा स्थापना गरिने छ ।