विराटनगर हुँदै फर्किए केआईआईटीका ७५ जना विद्यार्थी

विराटनगर । विराटनगरको रानी नाका हुँदै भारत उडिसास्थित कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी)मा अध्ययनरत ७५ जना विद्यार्थी घर फर्किएका छन् ।

नेपाली विद्यार्थी प्रकृति लम्सालको शंकास्पद मृत्युपछि विश्वविद्यालयले दुर्व्यवहार गर्दै निकोलको थियो । कलेजबाट निकालिएका मध्ये ७५ जना विद्यार्थी बुधबार विराटनगरकाे रानी नाका हुँदै घर फर्किएको जिल्ला प्रशासन कार्यालय मोरङले जनाएको छ । मंगलबार तीन जना फर्किएका थिए । मंगलबार राति काँकडभिट्टा नाकाबाट १६ जना विद्यार्थी फर्किएका थिए ।

प्रशासन कार्यालयका अनुसार मोरङका ३६, सप्तरीका १६, सुनसरीका ११ जना, काठमाडौँ र सिराहाका ३–३ जना, सर्लाही र जनकपुरका २–२ जना तथा ललितपुर र उदयपुरका १–१ जना विद्यार्थी फर्किएका हुन् ।

शंकास्पद अवस्थामा मृत भेटिएकी लम्सालको न्यायका लागि आवाज उठाउँदा कलेज प्रशासनले विद्यार्थीलाई दुर्व्यवहार गर्दै कलेजबाट निकालेको थियो ।  विद्यार्थीमाथि दुर्व्यवहार भएको विषयमा नेपाल र भारतमा आवाज उठेपछि कलेज प्रशासनले माफी मागेको थियो ।

भारतीय प्रहरीले लम्सालको शंकास्पद मृत्यु प्रकरणको अनुसन्धानका लागि एक युवकलाई पक्राउ गरेको छ ।

भुवनेश्वरस्थित कलेजको होस्टलमा बसेर बी–टेक तेस्रो वर्षमा अध्ययनरत लम्साल आइतबार मृत अवस्थामा भेटिएकी थिइन् ।