प्रकृतिका बुबाले भने,‘ हामीलाई न्याय चाहिएको छ’

काठमाडौं । भारतको कलिंगा इन्स्टिच्यूट अफ् इन्डस्ट्रियल टेक्नोलोजी (केआईआईटी)मा मृत भेटिएकी विद्यार्थी प्रकृति लम्सालका बुबा सुनिल लम्सालले न्याय मागेका छन् । ओडिसा पुगेर प्रहरी अधिकारीहरुसँग भेट गरेर उनले छोरीका लागि न्याय मागेका हुन् ।

भारतमै रहेका प्रकृतिका दाइ सिद्धान्तले घटनाबारे छानबिन गर्न माग गर्दै प्रहरी कहाँ सोमबार बिहानै एफआईआर दिएका थिए । आज बुबा सुनिलले भारतको समाचार एजेन्जी एअनआईसँग कुरा गर्दै न्याय मागेका हुन् ।

‘उनको मोबाइल, ल्यापटप, डायरीलगायत पनि फरेन्सिकले लगेको छ, त्यो रिपोर्ट आएपछि पनि के हो थाहा हुन्छ’, लम्सालले भनेका छन्, ‘अहिलेलाई हामीलाई यति सूचना छ कि उनीमाथि ह्यारेसमेन्ट र इमासनल ब्ल्याकमेलिङ भएको थियो, त्यही कारण उनले आत्महत्या गरेकी हुन् ।’

युनिभर्सिटीका व्यक्तिहरुले आधिकारिक रुपमा केही नबताए पनि प्रहरी अधिकृतहरुले भने आफूहरुसँग राम्रो समन्वय गरेको उनले बताएका छन् ।

‘हाम्रो माग न्याय पाउनुपर्‍यो भन्ने हो, अरु केही होइन’, उनले भने, ‘विद्यार्थीलाई पहिले आवश्यक परेका बेला बोलाउने अहिले यस्तो भयो जाउ भन्ने चाहिँ ठिक होइन, विद्यार्थीलाई त्यस्तो गर्नु भएन ।’

आइतबार अपराह्न २० वर्षीय प्रकृति होस्टलको कोठामा मृत अवस्थामा फेला परेकी थिइन् । साँझबाटै विद्यार्थीहरुले उनको न्यायको माग गर्दै प्रदर्शन थालेका थिए । तर, युनिभर्सिटी प्रशासनले प्रदर्शन गरेका विद्यार्थीहरुमाथि दमन गरेको थियो ।