फागुन १९ गतेदेखि विराट गोल्डकप, विजेताले ११ लाख पाउने

विराटनगर । फागुन १९ गतेबाट नवौं संस्करणको विराट गोल्डकप प्रतियोगिता आयोजना गरिने भएको छ । विराटनगरको सहिद रंगाशालामा हुने प्रतियोगितामा भारतीय २ वटा र नेपालका ८ वटा सहभागी हुनेछन् ।

विराट गोल्डकप ट्रष्टले गोल्डकप आयोजनाको जिम्मा उद्योगी नवीन रिजाललाई दिएको थियो । आठौं संस्करणको आयोजना ट्रष्ट आफैंले गरेको थियो । । ५ औं संस्करण पनि रिजालले नै गरेका थिए ।

सोमबार पत्रकार सम्मेलन गर्दै आयोजक समितिले नेपालका ८ गरेर प्रतियोगितामा १० वटा टिमको सहभागि हुने बताएको हो ।

गोल्डकप संयोजक रिजालका अनुसार त्रिभुवन आर्मी क्लब, नेपाल पुलिस क्लब र नेपाल एपीएफ फुटबल क्लब, थ्रीस्टार फुटबल क्लब, मच्छिन्द्र फुटबल क्लब, एनआरटी क्लब, चर्च ब्वाइज फुटबल क्लब र रिजालको मोरङ एफसीको सहभागी हुनेछन् ।भारतको साउथर्न समिति फुटबल क्बल कोलकाता र सुदेभा दिल्ली फुटबल सहभगी हुने उनले बताए ।

‘विराटनगरको साथ, फुटबलको विकास’ भन्ने नारा दिइएको प्रतियोगिता फागुन २७ गतेसम्म चल्नेछ । प्रतियोगिताको विजेता टिमलाई ११ लाख र उपविजेतालाई ५ लाख रूपैयाँ नगद पुरस्कार प्रदान गरिने छ । उत्कृष्ट प्रशिक्षक, गोलरक्षक र सर्वाधिक गोलकर्ताले १५–१५ हजार रूपैयाँ पाउने छन् ।

पुरस्कारबापत दैनिक हुने खेलको उत्कृष्ट खेलाडीलाई ११ हजार र सर्वोकृष्ट खेलाडीलाई ५१ हजार रूपैयाँ प्रदान गरिनेछ । गोल्डकप सम्पन्न गर्न १ करोड ३५ लाख रूपैयाँ खर्च हुने अनुमान गरिएको छ ।