झापामा जुनियर प्रहरी अधिकृत मृत भेटिए

विराटनगर । झापामा एक कनिष्ठ प्रहरी अधिकृत मृत भेटिएका छन् ।

भद्रपुर नगरपालिका– ८ मा रहेको जिल्ला प्रहरी कार्यालयको ब्यारेकको माथिल्लो तल्लामा ४९ वर्षीय प्रहरी नायव निरिक्षक धनराज खतिवडा झुण्डिएको अवस्थामा मृत फेला परेका हुन् ।

पानी ट्यांकीमा जाने फलामको भर्याङमा नाइलनको डोरीको पासो लगाएर झुन्डिएको अवस्थामा सई खतिवडा आज बिहान मृत फेला परेको निमित्त सूचना अधिकारी विजय चौहानले जानकारी दिए ।

उनको घर भोजपुरको टेम्केमैयुङ गाउँपालिका–४ हो ।

इलाका प्रहरी कार्यालय झिलझिले दरबन्दी भएका खतिवडा जिल्ला प्रहरी कार्यालय झापामा कार्यरत थिए । उनले आत्महत्या गरेको प्रहरीले बताएकाे छ ।