इनरुवाबाट करिब एक पावा ब्राउन सुगरसहित २ भारतीय पक्राउ

विराटनगर । प्रहरीले सुनसरीबाट करिब एक पावा ब्राउन सुगरसहित दुई जनालाई पक्राउ गरेको छ । पक्राउ पर्ने दुवैजना भारतीय नागरिक हुन् ।

शुक्रबार दिउँसो लागूऔषध नियन्त्रण व्यूरो विराटनगर र जिल्ला प्रहरी कार्यालय सुनसरीबाट खटिएको प्रहरी टोलीले इनरुवा नगरपालिका– १ नुतन पेट्रोल पम्प छेउबाट २१३. ३४ ग्राम ब्राउनसुगरसहित भारत बिहारको अररिया स्थित नरपथगंज सोनापुर– १ बस्ने ३३ वर्षीय कपिल मेहता र सोही स्थानका २८ वर्षीय पंकजकुमार पासवानलाई पक्राउ गरेको हो ।

उनीहरु बीआर ३८ एके०२११ मोटरसाइकलमा सवार थिए ।

प्रहरीका अनुसार कपिल मेहताले लगाएको हाफ ज्याकेटको भित्री गोजीबाट १०९.६५० ग्राम ब्राउन सुगर बरामद गरेको हो । उनको साथबाट थप १०३.६९० ग्राम बरामद भएको हो ।

पक्राउ परेकाहरु लागूऔषध कारोबारी भएको प्रहरीले बताएको छ ।