विराटनगरकाे साेरुमबाट चाेरी भयाे कार, सुनसरीमा भेटियाे

विराटनगर । विराटनगरमा सोरुम फुटाएर चाेरी भएकाे कार सुनसरीमा फेला परेकाे छ ।

चोरीमा संलग्न भएको आरोपमा १ जना पक्राउ परेका छन् ।

विराटनगर महानगरपालिका–३ पिपल चोकनजिक रहेको पूजा इन्टरनेशनल नेपाल प्रा।लिले सञ्चालन गरेको फोक्स बगान कम्पनीको सोरुमबाट बा ०१३० च ८५८१ नम्बरको अनटेस्ट कार चोरी भएको हाे ।

मोरङ प्रहरीका निमित्त प्रवक्ता इन्स्पेक्टर हेमराज ओलीका अनुसार बिहानका राति करिब २ बजेतिर मुख्य गेट खोलेर भित्र छिरेका व्यक्तिले सोरुमको सिसा भएको ढोका फोडेर टाइगुन कार चोरी गरेका थिए ।

उक्त कारको मूल्य ८० लाख पर्छ । सोरुमबाट चोरी भएको रातो रंगको कार प्रहरीले सुनसरीमा फेला पारेकाे छ । पेट्राेल सकिएर राेकिएकाे अवस्थामा प्रहरीले कार फेला पारेकाे हाे । कारसँगै चाेरीमा संलग्न भएकाे आराेपमा सुनसरीको गढी गाउँपालिका–४ घर भइ विराटनगर–४ मा बस्दै आएका २४ वर्षीय मन्तोषकुमार बिनलाई पनि पक्राउ गरेकाे छ ।

प्रहरीका अनुसार उनी कार लिएर भारत तर्फ जाँदैथिए ।

बिनले सोरुमको सिसा फुटाउन सानो कंक्रिटको ब्लक प्रयोग गरेको प्रहरीको भनाइ छ । सोरुमभित्र एउटा मात्रै गाडी रहेको र अन्य सामान नहराएको बताइएको छ । गाडीसँगै चाबी पनि राख्ने गरिएका कारण चोरेर भएकाे प्रहरीले बताएकाे छ ।