मोरङ कारागारमा रहेका एक बन्दीको मृत्यु

विराटनगर । जिल्ला कारागार मोरङमा रहेका एक बन्दीको मृत्यु भएको छ । कोशी अस्पताल विराटनगरमा उपचारका क्रममा मोरङको रतुवामाई नगरपालिका–५ का २९ वर्षीय किसुन टुडु सतारको मृत्यु भएको हो ।

जेलर गौरव ढुंगेलका अनुसार अचानक रिंगाटा लाग्ने र श्वासप्रश्वासमा गाह्रो हुने समस्या देखिएपछि किसुनलाई उपचारका लागि माघ २६ गते कोशी अस्पताल लगिएको थियो ।

उपचारको मंगलबार दिउँसो १ः४५ बजेतिर मृत्यु भएको हो ।

जबरजस्ती करणी मुद्दामा किसुनलाई जिल्ला अदालत मोरङले गत साउन ११ गते पुर्पक्षका लागि थुनामा राख्न आदेश दिएको थियो । उनको मुद्दा मोरङ अदालतमा विचाराधीन छ ।

पुरुष २ सय ५० र महिला ५० गरेर ३ सय ५० जना क्षमताको मोरङ कारागारमा हाल आश्रित बालबालिका ४, महिला ९७ र पुरुष ९ सय ८४ गरी १ हजार ८५ जना कैदीबन्दी छन् ।