मोरङमा सुरु भयो नागरिकताका लागि अनलाइन सिफारिस

विराटनगर । मोरङमा वडा कार्यालयहरुबाटै नागरिकताको अनलाइन सिफारिस सुरु भएको छ ।

विराटनगर महानगरपालिका–९ को वडा कार्यालयबाट विराटनगरका मेयर नागेश कोइराला र मोरङका प्रमुख जिल्ला अधिकारी इन्द्रदेव यादवले आइतबार सेवाको औपचारिक शुभारम्भ गरे ।

नागरिकता वितरणलाई सहज बनाउन सिफारिसलाई अनलाइन प्रणालीमा लगिएको प्रमुख जिल्ला अधिकारी यादवले बताए ।

मेयर कोइरालाले जनताले सर्वसुलभ तरिकाले सेवा पाइयोस् भन्ने अपेक्षा राख्ने गरेका कारण प्रविधिकको प्रयोगले सहज बनाउने बताए ।

मोरङमा १७ वटा स्थानीय तहमा १ सय ५९ वटा वडा छन् । सबै वडाबाट नागरिकताको सिफारिस अनलाइन प्रविधिमार्फत दिन थालिएको छ ।