संसद बैठकअघि उपेन्द्र यादवको दौडधुप बढ्याे

काठमाडौं ।सरकारले जारी गरेका ६ वटा अध्यादेश संसदमा निर्णयार्थ प्रस्तुत हुने भएपछि जनता समाजवादी पार्टी नेपालका अध्यक्ष उपेन्द्र यादवको दौडधुप बढेको छ । राष्ट्रिय सभामा निर्णायक भूमिका रहेका यादवको दौडधुप बढेको हो ।

जसपा नेपालको संसदीय दलको बैठकअघि उनले कांग्रेस सभापति शेरबहादुर देउवा र प्रधानमन्त्री केपी शर्मा ओलीसँग छुट्टाछुट्टै छलफल गरे ।

बिहान सभापति देउवालाई भेट्न यादव नयाँ बानेश्वरस्थित संसद् भवन पुगेका थिए भने लगत्तै प्रधानमन्त्री ओलीलाई भेट्न प्रधानमन्त्री निवास बालुवाटार पुगेका थिए ।

मन्त्रिपरिषद्को सिफारिसमा राष्ट्रपति रामचन्द्र पौडेले ६ वटै अध्यादेश जारी गरेका थिए ।

बिहीबार प्रतिनिधि सभा र राष्ट्रिय सभा दुवैमा सबै अध्यादेशहरू निर्णयार्थ प्रस्तुत गर्ने सम्भावित कार्यसूची छ ।

प्रतिनिधिसभामा कांग्रेस एमालेको सहज बहुमत भएपनि राष्ट्रिय सभामा सत्तापक्ष अल्पमतमा छ ।

५९ सदस्यीय राष्ट्रियसभामा बहुमत पुर्‍याउन ३० सिट अनिवार्य हुन्छ । राष्ट्रियसभामा कांग्रेसका १६ र एमालेका १० सांसद छन् । मनोनित नेतृ अञ्जना शाक्य र वामदेव गौतमसहित गर्दा एमालेसँग १२ सिट छ । कांग्रेस र एमाले जोडेर २८ मात्रै पुग्छ । लोकतान्त्रिक समाजवादी पार्टी लोसपाको १ जना पनि सत्तापक्षमा छन् ।

विपक्षमा माओवादी केन्द्र १७, नेकपा एकीकृत समाजवादी ८ र राष्ट्रिय जनमोर्चा १ गरेर २६ जना सांसद छन् ।

सरकारमा नरहेको जसपा नेपालसँग ३ जना सांसद छन् । यदि जसपा नेपालका तीन जना सांसद अध्यादेशको पक्षमा उभिए अध्यादेश पास हुनेछ ।