साैराहमा निकुञ्जका सुरक्षाकर्मीले मारे मकुना हात्ती

काठमाडौं । चितवनको सौराहा क्षेत्रमा सुरक्षाकर्मीले गाेली प्रहार गरी मकुना हात्ती मारेका छन् । जंगली हात्ती मकुनाको निकुञ्जको सुरक्षाका लागि खटिएका सुरक्षाकर्मीकै गोली लागेर मृत्यु भएको हो ।

बस्ती छिरेर तर्साउने हात्तीलाई तर्साउन भन्दै घाटीमा गोली प्रहार भएको थियो ।

उक्त हात्ती असोज महिनादेखि सौराहा आसपासमा पसेर स्थानीयलाई त्रसित बनाउँदै आएको निकुञ्जले विज्ञप्तिमार्फत दाबी गरेको छ ।

बुधबार हात्ती स्वीप गस्ती टोलीले स्वीपिङ गस्ती गर्दै जाने क्रममा कुमरोज मध्यवर्ती सामुदायिक वनको लामिताल इलाकामा मकुना अकस्मात् फेला परेको थियो ।

घरपालुवा हात्ती (चुरेगज)लाई आक्रमण गर्न खोजेपछि राष्ट्रिय निकुञ्ज तथा वन्यजन्तु संरक्षण ऐन, २०२९ को दफा २१ मा भएको व्यवस्था बमोजिम आत्म सुरक्षाको लागि वार्निङ फायर गरिएको निकुञ्जले जनाएको छ ।

‘हवाई फायर गर्दा पनि नभागी हात्तीलाई आक्रमण गर्न आउँदा सानो हात्ती खगेन्द्रप्रसादमा सवार रेञ्जर श्याम तामाङ हात्तीबाट खसेकोले ज्यानको सुरक्षा गर्न अत्यन्तै कठिनाइ भएको कारण ३ राउन्ड फायर गर्दा केही पर भागी पुनः फर्किएर आक्रमण गर्न आएकोमा थप १ राउन्ड फायर गर्दा मुकुना अन्यत्र भागेको’, विज्ञप्तिमा भनिएको छ, ‘पछि खोज्दै जाने क्रममा करिब १ किमी टाढा ढलेको अवस्थामा साढे १ बजे फेला परेको ।’

पोस्टमार्टमका क्रममा हात्तीको दाहिनेपट्टी घाँटीमा एउटा गोली लागेको भेटिएको थियो ।