अदालतको आदेश विपरित नियुक्ती, सदस्यसचिव बस्नेतविरुद्ध अवहेलना मुद्दा

विराटनगर । उच्च अदालत विराटनगरको आदेश विपरित कोशी प्रदेश खेलकुद विकास बोर्डले मोरङ जिल्ला खेलकुद विकास समितिको अध्यक्ष नियुक्त गरेकाे छ ।

चार वर्षे कार्यकालका लागि २०८० चैत २३ गते नियुक्त भएका इन्द्रकुमार योञ्जन तामाङ्गलाई हटाएर कोशी प्रदेश खेलकुद विकास बोर्डकाे माघ १७ गते बसेकाे बैठकले सुरजबहादुर श्रेष्ठलाई नियुक्त गरेकाे हाे । त्यसपछि अदालतकाे आदेशकाे अवहेलना भएकाे दाबी गर्दै तामाङले  उच्च  अदालत विराटनगरमा अवहेलना मुद्दा दर्ता दायर  गरेका छन् ।

गत २०८१ भदौ ४ गते खेलकुद विकास बोर्डका सदस्य सचिव कृष्ण बस्नेत (पर्शुराम)ले तामाङलाई निलम्बन गर्ने निर्णय गरेका थिए । निलम्बनविरुद्ध तामाङले उच्च अदालतमा रिट दायर गरेका थिए । अदालतले बोर्डको निर्णय कार्यान्वयन नगर्न र योञ्जनलाई काम गर्न दिन भन्दै भदौ १२ गते अन्तरिम आदेश दिएको थियो ।

भदौ २० गते उच्च अदालतका न्यायाधीश विपुल न्यौपाने र श्रीधरा कुमारी पुडासैनीको संयुक्त इजालशले तामाङलाई जिल्ला खेलकुद विकास समितिको अध्यक्षमा गरेर काम कारवाही गर्न दिनु भन्ने १२ गतेको आदेशलाई निरन्तरता दिएको थियो । अदालतले अन्तरिम आदेशलाई निरन्तरता दिएको सो रिटमा पुस १ गते र माघ १४ गते तोकिएको पेशी खेलकुद बोर्डकै पक्षबाट सारिएको थियो । अर्को पेशी फागुन २६ गतेलाई तोकिएको छ । रिट विचाराधीन भएको अवस्थामा नयाँ नियुक्ति गरेपछि फेरि यो विषय अदालतमा प्रवेश गरेको हो ।

आफूलाई काम गर्न दिनु भन्ने उच्च अदालतको आदेश विपरित काम गर्न नदिएको र नयाँ नियुक्ति गरेको भन्दै योञ्जनले प्रदेश खेलकुद विकास बोर्ड र सदस्य सचिव बस्नेतलाई विपक्षी बनाएर सोमबार उच्च अदालत विराटनगरमा अदालतको अवहेलनामा कारवाही गरी पाउँ भन्दै मुद्दा दायर गरेका हुन् ।

प्रदेश खेलकुद विकास बोर्डको सदस्य सचिव हशंराज वाग्ले भएको बेला २०८० चैत २३ गते तामाङले खेलकुद विकास समिति मोरङको अध्यक्षमा नियुक्ति पाएका थिए । सदस्य सचिवमा एमाले नेता बस्नेत पुनर्वहाली भएपछि योञ्जनलाई निलम्बन गरेका थिए ।