चाँदनीको हत्यामा मामली घरका सदस्यसँगै आमाको पनि संलग्नता रहेकाे प्रहरी निष्कर्ष

विराटनगर । विराटनगर महानगरपालिका–५ को कलेर्वा टोलमा खाल्डो खनेर गाडेको अवस्थामा फेला परेकी बालिकाको हत्यामा मामली परिवारसदस्यसहित आमाको पनि संलग्नता रहेको निष्कर्षमा प्रहरी पुगेको छ ।

शुक्रबार बालिकाको शव खाल्डोमा गाडिएको अवस्थामा फेला परेको थियो । बालिकाको हत्या माघ ११ गते शुक्रबार राति भएको हुनसक्ने प्रहरीको भनाई छ । यद्यपि, अनुसन्धानका क्रममा पक्राउ परेकाहरुबाट भने घटनाका बारेमा थप कुरा खुल्न नसकिरहेको प्रहरीले जनाएको छ ।

प्रहरीले शुक्रबार शव उत्खनन गरेर पोस्टमार्टमका लागि कोशी अस्पताल लग्यो । मोरङ प्रहरीका प्रवक्ता डीएसपी वेदप्रकाश जोशीले पोस्टमार्टमका लागि आवश्यक प्रक्रिया सुरु गरिएको जानकारी दिए ।

चाँदनी बाबु लालमोहन यादव र आमा राजकुमारी मण्डल यादवसँगै करिब १ महिनाअघि विराटनगर–५ स्थित मामाघर आएकी थिइन् । घर भारत बिहारको छपरा जिल्लामा पर्छ । उनका बुबाआमा केही दिनबसेर फर्किएका थिए । आमा केही दिनअघि नेपाल आएकी थिइन् । माइतबाट राजकुमारी एक्लै घर फर्किएकाे र चाँदनी पनि मामाघरमा नदेखिएपछि बेपत्ता भएको हल्ला गाउँमा चलेको थियो । त्यो सूचना प्रहरीमा पुग्यो । डीएसपी जोशीको नेतृत्वमा खटिएको प्रहरी टोलीले खोजतलास गरी शव गाडेको स्थान पत्ता लगाएको हो ।

चाँदनीको हत्यापछि मामाघरबाट १ सय २५ फिट दक्षिणमा ४ फिट गहिरो खाल्डो खनेर शरीरका कपडासहितको शव गाडिएको थियो । ‘भारतमा १ व्यक्तिसँग चाँदनीको प्रेम सम्बन्ध रहेछ । ती व्यक्तिसँग छुटाउने उद्देश्य राखी बाबुआमाले उनलाई मामली लिएर आए । तर, चाँदनीले छुट्न नसक्ने अड्डी कसिन् । रिसको झोंकमा सबै मिलेर हत्या गरेपछि घटना लुकाउन शव गाडेको पाइयो,’ प्रहरी स्रोतले भन्यो ।

प्रहरीका अनुसार यो घटनामा बालिकाकी आमा राजकुमारीको संलग्नता देखिएको छ । बुबा लालमोहनको संलग्नता रहे नरहेको विषयमा अनुसन्धान भइरहेको छ ।

हत्या कसरी गरियोभन्ने यकिन छैन । ‘हत्या कसरी भयो भनेर अहिल्यै भन्न सकिँदैन । हेरेर अनुमान गर्नसक्ने अवस्था छैन । शव सडेर दुर्गन्धित भएको अवस्थामा भेटिएको छ । घटना यकिन गर्न पोस्टमार्टम रिपोर्ट आउनैपर्छ । थप अनुसन्धानसमेत भइरहेको छ,’ डीएसपी जोशीले भने ।

घटनापछि चाँदनीका मामली हजुरबुवा अन्दाजी ५७ वर्षीय सरजुग मण्डल, उनकी पत्नी जानकी मण्डल, सरजुगका भाइ पर्ने बतासी मण्डल, छोरा रामबाबु मण्डल, जेठी छोरी उर्मीला मण्डल, नातिनी अञ्जली मण्डल र नाति बबिदेवल मण्डललगायत ८ जनालाई प्रहरीले नियन्त्रणमा लिएर सोधपुछ गरिरहेको छ ।