मामाघर आएकी बालिकाको शव गाडेकाे अवस्थामा भेटियो, हजुरबुबा पक्राउ

विराटनगर । भारतको बिहारबाट विराटनगर महानगरपालिका – ५ स्थित मामाघर आएकी बालिकाको शव करेसाबारीमा खाल्डो खनेर गाडेको अवस्थामा फेला परेको छ ।

१४ वर्षीया चाँदनी यादवको शव खाल्डो खनेर गाडिएको अवस्थामा शव फेला परेको हो ।

एकसातादेखि बालिका हराएको सूचना आएपछि शुक्रबार खोजी गरेको प्रहरीले खाल्डो खनेर गाडेको अवस्थामा शव फेला परेको हो । खाल्डोबाट शव निकालेर प्रहरीले पोष्टमार्टमका लागि पठाएको छ ।

हत्यापछि शव गाडेको आरोपमा अनुसन्धानका लागि प्रहरीले मावलीतर्फका हजुरबुबा ५७ वर्षीय सर्जुक  मण्डललाई पक्राउ गरेको छ ।

मोरङका डीएसपी वेदप्रकाश जोशीले विराटनगर– ५ घर भएका मृतक बालिका चाँदनीका हजुरबुबा सर्जुकलाई नियन्त्रणमा लिएर अनुसन्धान सुरु गरेको बताए ।
उनका अनुसार एक हप्ताअघि हत्यापछि बालिकाको शव गाडेको जस्तो देखिन्छ । शव गाडेको स्थानलाई तोरीको जट्टेले छोपिएको अवस्थामा फेला परेको उनले बताए ।