महाकुम्भमा भागदाैड हुँदा मृत्यु हुनेकाे संख्या ३० पुग्याे

काठमाडौं । भारतको उत्तरप्रदेशस्थित प्रयागराजमा जारी महाकुम्भ मेलामा भागदौड हुँदा मृत्यु हुनेको संख्या ३० पुगेको छ ।

महाकुम्भमा खटिएका डीआईजी वैभव कृष्णले बुधबार साँझ सञ्चारकर्मीहरूसँग कुरा गर्दै महाकुम्भमा भएको भागदौडमा परी मृत्यु हुनेको संख्या ३० पुगेको जानकारी दिएका हुन् । मृतक मध्ये २५ जनाको सनाखत भइसकेको छ ।

भारतीय सञ्चारमाध्यमहरूका अनुसार भागदौडमा ६० जना घाइते भएका छन् ।

१३ जनवरीदेखि सुरु भएको महाकुम्भ मेलामा हालसम्म १५ करोड व्यक्तिले गंगामा स्नान गरेको अनुमान छ ।

बुधबारको दिन मौनी अमावस्या अर्थात माघ कृष्ण औंसीका अवसरमा १० करोडभन्दा धेरै श्रद्धालु कुम्भ मेलामा सहभागी हुने अनुमान गरिएको थियो । तर,मंगलबार राति नै प्रयागराजको संगमस्थानबाट भागदौड मच्चिएको थियो ।