बजेट खर्चमा कमजाेर दुई तिहाइकाे सरकार, ६ महिनामा ८ अर्ब ८७ करोड मात्रै खर्च

विराटनगर । कोशी प्रदेश सरकारले चालु आर्थिक वर्षको ६ महिनामा जम्मा आठ अर्ब ८७ करोड ७६ लाख मात्रै बजेट खर्च गरेको छ ।

आर्थिक वर्ष २०८१/८२ का लागि ३५ अर्ब २७ करोड ९३ लाखको बजेट विनियोजन भएको थियो । पुससम्म ६ महिनाको अवधिमा ८ अर्ब ८७ करोड ७६ लाख २० हजार रुपैयाँ खर्च भएको हो । यो खर्च बजेटकाे २४.८५ प्रतिशत हो ।

मंसिर महिनासम्म सरकारले ७ अर्ब ७ करोड ८५ लाख रुपैयाँ खर्च गरेको थियो ।  सरकारले अब ६ महिनामा खर्च गर्नुपर्ने बजेट २६ अर्ब ४१ करोड १६ लाख ७९ हजार ८४१ रुपैयाँ छ ।

पछिल्लो ६ महिनामा खर्च भएको रकममा चालु खर्चको हिस्सा ठूलो छ । प्रदेश कोष तथा लेखा नियन्त्रण कार्यालयका अनुसार ६ महिनाको अवधिमा ६ अर्ब २० करोड ९६ लाख ७३ हजार रुपैयाँ चालु खर्च भएको छ । ६ महिनाको अवधिमा पूजीँगत खर्च भने २ अर्ब ५५ करोड८५ लाख३४ हजार मात्रै भएको छ ।

प्रदेशमा चालु तर्फ १८ अर्ब ७३ करोड ४९ लाख र पूजीगत तर्फ १६ अर्ब ५२ करोड ४३ लाख ९३ हजार रुपैयाँ बिनियोजन  भएको थियो ।

प्रदेश सरकारले चालु तर्फ बिनियोजन भएको मध्ये ३३.१४ पूजीँगत तर्फ १५.४८ प्रतिशत बनेट खर्च गरेको छ ।

प्रदेशका आर्थिक वर्षको अन्त्यमा मात्रै बजेट खर्च गर्ने प्रवृति छ । प्रदेशले बजेट खर्च गर्न नसकेको प्रतिपक्षी दलहरुले आरोप लगाउँदै आएका छन् ।

नेकपा माओवादी केन्द्र काेशी प्रदेश संसदीय दलका नेता इन्द्रबहादुर आङ्बो दुई ठूला दल मिलेर बनेको दुई तिहाई बहुमतकाे सरकारले बजेट खर्च गर्न नसकेको बताउँछन् । नयाँ सरकार बनेकाे ६ महिनाकाे अवधिमा प्रदेशकाे विकास खर्च निराशाजनक रहेकाे उनले बताए ।