टिकटक हेरे जसरी समाचार पढ्न मिल्ने एप सार्वजनिक

विराटनगर । टिकटकमा भिडियो हेरे जसरी समाचार पढ्न पाइने ‘ताजा खबर एप’ सार्वजनिक भएकाे छ । भीसंसार अनलाइन प्रालि विराटनगरले नयाँ एप सार्वजनिक गरेकाे हाे । टिकटक हेरे जसरी पढ्न पाइने  यो नेपालकै पहिलो न्यूज एप भएको उक्त कम्पनीकी अध्यक्ष आरती कुमारी काफ्ले श्रेष्ठले जानकारी दिइन् ।

एपको विशेषता भनेकै यसको प्रस्तुति हो । टिकटकमा जस्तै एक पटकमा एउटा मात्र समाचार देखाइने र स्लाइड गर्दै समाचार पढ्न पाइने हुँदा यो एपले समाचार पढ्ने शैलीलाई प्रयोगकर्तामैत्री बनाउने उनले बताइन् । अहिलेको समयको मागअनुसार एप निर्माण गरिएको बताइन् ।

उनकाअनुसार एपमा समाचारका अतिरिक्त धेरै खालका सञ्चार र व्यवशायिक सेवाहरु उपलब्ध छन् । एपमा बल्क एसएमएसको सेवा पनि छ । जसमार्फत्, प्रयोगकर्ताले आफ्नो मोबाइल नम्बरमा भएका धेरैजनालाई एकैपटकमा सन्देश पठाउन सक्नेछन् ।

यो एपमा कोशी प्रदेशका विभिन्न समाचार अनलाइनहरुमा पनि विज्ञापन दिने सुविधा छ । जुन विज्ञापन विभिन्न अनलाइनहरुमा प्रकाशन हुन्छ र त्यसको भ्युजअनुसार पैसा तिर्दा हुन्छ । यसले विज्ञापनदाता र सञ्चारमाध्यम दुवैलाई फाइदा दिने कम्पनीको दाबी छ ।

एपले काम खोज्ने र दिने दुवैका लागि जब लिस्टिङको सुविधा पनि दिएको छ। यसका माध्यमबाट रोजगारीका अवसरहरूबारे जानकारी दिन र आवेदन दिन सकिन्छ । साथै, घरजग्गाको कारोबार पनि यो एपबाट गर्न सकिन्छ ।

एन्ड्रोइड भर्सन मात्र उपलब्ध भएपनि चाँडै आइओएसमा पनि तयार हुने कम्पनीले जनाएको छ ।