सूर्यदर्शन सहकारी ठगी प्रकरण : सरकारी वकिल पछि रवि पनि उच्च अदालत

काठमाडौं । पोखराको सूर्यदर्शन बचत तथा ऋण सहकारीको बचत अपचलन मुद्दा जिल्ला अदालत कास्कीको थुनछेक आदेशविरुद्ध सरकारी वकिल र प्रतिवादी रवि लामिछाने पनि उच्च अदालत पुगेका छन् ।

सरकारी वकिलको कार्यालय जिल्ला अदालतको आदेश उल्टाएर पुर्पक्षका लागि थुनामै राखेर मुद्दाको पुर्पक्षको मागसहित उच्च अदालतमा पुगेको थियो । रवि लामिछाने पनि धरौटीमा छाड्ने जिल्लाको आदेश बदर गरी साधारण तारेखमा पूर्पक्षको मागसहित पुगेका हुन् ।

कास्की जिल्ला अदालतका न्यायाधीश नितिज राईको इजलासले २५ पुसमा लामिछानेलाई तत्काल प्राप्त प्रमाणबाट अहिले नै कसुरदार रहेनछन् भन्न सकिएन भन्दै ६५ लाख धरौटी माग गरेको थियो ।

लामिछानेलाई थुनामै राखेर मुद्दाको बाँकी कारबाही अघि बढाउनुपर्ने माग राखी सरकारी पक्ष उच्च अदालत पुगेपछि लामिछाने पनि जिल्लाको आदेशविरुद्ध उच्च अदालत पुगेका हुन् ।

कास्की अदालतले फौजदारी कार्यविधि संहिता २०७४ को दफा ६८ अनुसार धरौटीमा पूर्पक्ष गर्न आदेश दिएको थियो । आदेशमा बेरितको भएकाले बदर गरी सोही संहिताको दफा ६९ साधारण तारेखमा बसी मुद्दा पुर्पक्ष गरी पाउँ भनी लामिछानेले उच्च अदालतमा निवेदन दर्ता गराएको उनका अधिवक्ताले दाबी गरेका छन् ।

कास्की अदालतमा सूर्यदर्शन सहकारी ठगी प्रकरणमा उपर सहकारी ठगी, संगठित अपराध र सम्पत्ति शुद्धीकरण गरी तीनवटा अभियोगमा मुद्दा चलिरहेको छ ।
कास्कीको आदेशपछि धरौटी बुझाएर छुटेका रविलाई काठमाडौंको स्वर्णलक्ष्मी सहकारी ठगीसम्बन्धी मुद्दामा ६० लाख रुपैयाँ धरौटीमा छाडेको थियो । आइतबार मात्र बुटवलको सुप्रिम सहकारी ठगीसम्बन्धी मुद्दामा एक करोड रुपैयाँ धरौटी बुझाएर छुटेका थिए ।